ഇത് കെണിയാണെന്ന് തിരിച്ചറിയുക!

2004 ഡിസംബറില്‍ അടുത്ത പതിനഞ്ചുവര്‍ഷക്കാലത്തെ ലോകക്രമം എങ്ങനെയായിരിക്കുമെന്ന് പ്രവചിച്ചുകൊണ്ട് അമേരിക്കയിലെ  നാഷണല്‍ ഇന്റലിജന്‍സ് കൗണ്‍സില്‍ (എന്‍. ഐ. സി) പുറത്തിറക്കിയ മാപ്പിംഗ് ദി ഗ്രോബല്‍ ഫ്യൂച്ചര്‍ എന്ന 121 പുറങ്ങളുള്ള രേഖ നല്‍കുന്ന വിവരങ്ങള്‍ ഇന്നത്തെ ലോകസംഭവങ്ങളുമായി പുലര്‍ത്തുന്ന സാമ്യം അത്ഭുതകരമാണ്. തങ്ങളുടെ വിദേശകാര്യബന്ധങ്ങള്‍ എങ്ങനെയാകണമെന്നും ദേശീയ സുരക്ഷക്കാവശ്യമായ കാര്യങ്ങള്‍ എന്തൊക്കെയാണെന്നും തീരുമാനിക്കുവാന്‍ അമേരിക്കന്‍ രാഷ്ട്രനേതൃത്വത്തെ സഹായിക്കാനുതകുന്ന വിവരങ്ങള്‍ നല്‍കുന്നതിനായി പ്രവര്‍ത്തിക്കുന്ന പതിനേഴ് സ്വതന്ത്രാധികാര സംഘങ്ങളുടെ കൂട്ടമായ ‘യുനൈറ്റഡ് സ്റ്റേറ്റ് ഇന്റലിജന്‍സ് കമ്മ്യൂണിറ്റി’യിലെ പ്രബലമായ ഒരംഗം ഔദ്യോഗികമായി പുറത്തിറക്കിയ രേഖയില്‍ പറയുന്നത് പ്രകാരമാണ് ലോകസംഭവങ്ങളില്‍ അധികവും ഇന്ന് നടന്നുകൊണ്ടിരിക്കുന്നത് എന്ന നിരീക്ഷണം, സംഭവങ്ങള്‍ നേരത്തെ തിരക്കഥ തയ്യാറാക്കി സംവിധാനിക്കപ്പെട്ടതാണെന്ന് സംശയിക്കുവാന്‍ ഇട നല്‍കുന്നതാണെന്ന് കടുത്ത സാമ്രാജ്യത്വ പക്ഷപാതികള്‍ പോലും സമ്മതിക്കും. 1979ല്‍ ഏകധ്രുവലോകത്തിന്റെ ഉദയത്തിലേക്ക് നയിച്ച സംഭവങ്ങള്‍ നടന്നുകൊണ്ടിരിക്കുന്നതിനിടയില്‍ രൂപീകരിക്കപ്പെട്ട എന്‍. ഐ. സിയുടെ പ്രധാനപ്പെട്ട പണി മാറിവരുന്ന അമേരിക്കന്‍ പ്രസിഡന്റുമാര്‍ക്ക് അടുത്ത പതിനഞ്ചുവര്‍ഷത്തെ ലോകക്രമം എങ്ങനെയായിരിക്കുമെന്ന് പഠിപ്പിക്കുന്ന ഗ്ലോബല്‍ ട്രെന്റ്‌സ് റിപ്പോര്‍ട്ട് നല്‍കലാണെന്ന് അവരുടെ ഔദ്യോഗിക വെബ്‌സൈറ്റ് വ്യക്തമാക്കുന്നുണ്ട്. പ്രസിഡന്റിനെ തീരുമാനിച്ചുകഴിഞ്ഞ് അദ്ദേഹത്തിന്റെ സ്ഥാനാരോഹണത്തിന് മുമ്പായി സമര്‍പ്പിക്കപ്പെടുന്നതാണ് പ്രസ്തുത റിപ്പോര്‍ട്ട് എന്ന വസ്തുത അതിന്റെ പ്രാധാന്യത്തെ വെളിപ്പെടുത്തുന്നതാണ്. തെരഞ്ഞെടുപ്പിന്റെ തിരക്കുകള്‍ കഴിഞ്ഞ് പ്രസിഡണ്ട് ആരാണെന്ന് തീരുമാനിക്കപ്പെട്ട വ്യക്തിക്ക്, സ്ഥാനാരോഹണത്തിന് ശേഷമുള്ള കൃത്യാന്തര ബാഹുല്യങ്ങളിലേക്ക് കടക്കുന്നതിനു മുമ്പു ലഭിക്കുന്ന ഒഴിവു സമയത്ത് യഥേഷ്ടം സമയമെടുത്ത് ഈ രേഖ പഠിക്കുവാന്‍ കഴിയണമെന്നതുകൊണ്ടാവാം പ്രസ്തുത സമയം തന്നെ രേഖാസമര്‍പ്പണത്തിന് അതിനു പിന്നില്‍ പ്രവര്‍ത്തിക്കുന്നവര്‍  തെരഞ്ഞെടുക്കുന്നത്്. ഗ്ലോബല്‍ ട്രന്‍ഡ്‌സ് റിപ്പോര്‍ട്ടുകള്‍ നല്‍കാനാരംഭിച്ചത് 1996 മുതലാണ്. 2010 വരെയുള്ള വരെയുള്ള ലോകക്രമം എങ്ങനെയായിരിക്കുമെന്ന് പ്രവചിക്കുന്ന ഒന്നാമത്തെ റിപ്പോര്‍ട്ട് ബില്‍ക്ലിന്റനു മുമ്പിലാണ് ആദ്യമായി സമര്‍പിക്കപ്പെട്ടത്. 2000 ഡിസംബറില്‍ 2015 വരെയുള്ള ലോകക്രമത്തെക്കുറിച്ചും 2004 ഡിസംബറില്‍ 2020 വരെയുള്ള ലോകക്രമത്തെകുറിച്ചുമുള്ള റിപ്പോര്‍ട്ടുകള്‍ സമര്‍പ്പിക്കപ്പെട്ടത് ജോര്‍ജ് ബുഷിനും 2008 നവംബറില്‍ 2025 വരെയുള്ളതും 2012ല്‍ 2030 വരെയുള്ളതുമായ റിപ്പോര്‍ട്ടുകള്‍ ബരാക്ക് ഒബാമക്കുമാണ് സമര്‍പ്പിക്കപ്പെട്ടത്. ഗ്ലോബല്‍ ട്രെന്റ്‌സ് റിപ്പോര്‍ട്ടുകള്‍ നല്‍കാനാരംഭിച്ച 1996ല്‍ തന്നെയാണ് ഇസ്‌ലാമും പാശ്ചാത്യലോകവും തമ്മില്‍ നിലനില്‍ക്കുന്നത് സംസ്‌കാരങ്ങളുടെ സംഘട്ടനമാണെന്ന് സമര്‍ഥിച്ചുകൊണ്ടുള്ള സാമുവല്‍ പി ഹണ്ടിംഗ്ടന്റെ ദി ക്ലാഷ് ഓഫ് സിവിലൈസേഷന്‍ ആന്റ് ദി റി മേക്കിംഗ് ഓഫ് വേള്‍ഡ് ഓര്‍ഡര്‍ എന്ന കൃതി പുറത്തിറങ്ങിയത് എന്നത് യാദൃഛികതയാകാം. എന്നാല്‍ ഈ കൃതിയും ഗ്ലോബല്‍ ട്രെന്റ്‌സ് റിപ്പോര്‍ട്ടുകളും മുന്നില്‍ വെച്ച് ഒരു താരതമ്യത്തിന് വിധേയമാക്കിയാല്‍ ‘നാളെ എങ്ങനെയാകു’മെന്ന പ്രവചനപ്രസ്താവനകളുടെ വരികള്‍ക്കിടയിലൂടെ അമേരിക്ക ആഗ്രഹിക്കുന്ന വിധത്തിലുള്ള ലേകക്രമത്തിന് ‘നാളെ എങ്ങനെയാകണം’ എന്ന ശക്തമായ വിധിപ്രസ്താവനകളാണ് നമുക്ക് വായിക്കാനാവുക.
ഇസ്‌ലാമിക ഭീകരതയെന്ന് സാമ്രാജ്യത്വവും കൂട്ടരും വിളിക്കുന്ന പ്രതിഭാസം പ്രചാരത്തിലാകുന്നതിന് മുമ്പ്, 1996ല്‍ തയ്യാറാക്കിയ ഒന്നാമത്തെ ഗ്ലോബല്‍ ട്രെന്റ്‌സ് റിപ്പോര്‍ട്ടില്‍ തന്നെ 2010വരെ ലോകത്ത് നിലനില്‍ക്കാന്‍ പോകുന്ന ഭീകരതയെക്കുറിച്ചുള്ള പരാമര്‍ശങ്ങളുണ്ട്. അല്‍ ക്വാഇദയുടെ ആദ്യത്തെ അമേരിക്കന്‍ ആക്രമണമായി അറിയപ്പെടുന്ന കിഴക്കേ ആഫ്രിക്കന്‍ നഗരങ്ങളായ ദാറുസ്സലാമിലും നെയ്‌റോബിയിലുമുള്ള അമേരിക്കന്‍ എംബസികള്‍ തകര്‍ത്ത സംഭവം നടക്കുന്നത് റിപ്പോര്‍ട്ടിന് രണ്ടുവര്‍ഷങ്ങള്‍ക്കു ശേഷം 1998 ഓഗസ്റ്റ് ഏഴിനായിരുന്നുവെന്നോര്‍ക്കുക. ഭീകരത ഒരു ആഗോള പ്രതിഭാസമായി അറിയപ്പെട്ടുതുടങ്ങിയിട്ടില്ലാത്ത കാലത്ത് 2010 വരെയുള്ള ലോകക്രമത്തില്‍ ഭീകരത വലിയൊരു പ്രശ്‌നമായിരിക്കുമെന്നും മധ്യപൗരസ്ത്യദേശത്തെ തൊഴില്‍രഹിതരായ ചെറുപ്പക്കാര്‍ വര്‍ധിച്ച തോതില്‍ അതിലേക്ക് ആകര്‍ഷിക്കപ്പെടുമെന്നും ഇറാക്വില്‍ സദ്ദാം ഹുസൈന്റെ കാലം അവസാനിക്കുമെന്നുമെല്ലാം ദീര്‍ഘദര്‍ശനം നടത്തണമെങ്കില്‍ അത്യപാരമായ പ്രവചനശേഷിയുണ്ടാവണം! അതല്ലെങ്കില്‍ തങ്ങള്‍ക്ക് ആഗ്രഹമുള്ളത് സ്വപ്‌നം കാണുവാനും അതിനെ പ്രവചനമായി അവതരിപ്പിക്കുവാനും അത്തരം അവസ്ഥ സൃഷ്ടിക്കാനാവശ്യമായ രീതിയിലുള്ള കരുനീക്കങ്ങള്‍ നടത്തുവാനുമുള്ള അധികാരവും കഴിവുമുണ്ടാവണം. അമേരിക്കയുടെ കയ്യിലുള്ളത് രണ്ടാമത്തേതാണ് എന്ന് ആര്‍ക്കാണ് അറിഞ്ഞുകൂടാത്തത്?!!
2004 ഡിസംബറില്‍ ജോര്‍ജ് ഡബ്ലിയു ബുഷിനുമുമ്പില്‍ സമര്‍പിക്കപ്പെട്ട ഗ്ലോബല്‍ ട്രെന്റ്‌സ് റിപ്പോര്‍ട്ടിലാണ് 2020 വരെയുള്ള ലോകം എങ്ങനെയായിരിക്കുമെന്ന് പ്രവചിക്കുന്നത്. ഈ റിപ്പോര്‍ട്ടിന് നല്‍കിയിട്ടുള്ള തലക്കെട്ട് ‘മാപ്പിംഗ് ദി ഗ്ലോബല്‍ ഫ്യൂച്ചര്‍’ എന്നാണെന്ന കാര്യ ശ്രേദ്ധേയമാണ്. ‘ആഗോള ഭാവിയുടെ ചിത്രീകരണം’ എന്നര്‍ഥം. ഇതിനുശേഷമുള്ള റിപ്പോര്‍ട്ടുകളുടെ തലക്കെട്ടുകള്‍ കൂടി പരിശോധിച്ചാല്‍ ഈ റിപ്പോര്‍ട്ടിലെ ‘മാപ്പിംഗ്’ കൊണ്ട് വിവക്ഷിച്ചതെന്തെന്ന് കൃത്യമായി മനസ്സിലാകും. ബരാക് ഒബാമക്ക് 2008ല്‍ സമര്‍പിക്കപ്പെട്ട 2025 വരെയുള്ള ലോകത്തെ സംബന്ധിച്ച റിപ്പോര്‍ട്ടിന്റെ തലക്കെട്ട് ‘ദി ട്രാന്‍സ്‌ഫോര്‍മ്ഡ് വേള്‍ഡ്’ എന്നും 2012ല്‍ സമര്‍പ്പിക്കപ്പെട്ട 2030 വരെയുള്ള റിപ്പോര്‍ട്ടിന്റെ തലക്കെട്ട് ‘ആള്‍ട്ടര്‍നേറ്റീവ് വേള്‍ഡ്’ എന്നുമാണ്. അമേരിക്ക ആഗ്രഹിക്കുന്ന തരത്തിലുള്ള ലോകക്രമത്തിലേക്ക് 2025 ഓടെ എത്തണമെന്നാണ് അവരുടെ സ്വപ്‌നമെന്ന് ഈ തലക്കെട്ടുകള്‍ വ്യക്തമാക്കുന്നുണ്ട്. പ്രസ്തുത ലോകക്രമങ്ങളിലേക്ക് നയിക്കുന്ന സംഭവങ്ങളാണ് 2020 വരെ ലോകത്ത് നടക്കുകയെന്ന് ‘ആഗോളഭാവിയുടെ ചിത്രീകരണ’ത്തില്‍ വ്യക്തമാണ്. 2025ല്‍ ഉണ്ടാകേണ്ട മാറിയ ലോകത്തിന് പറ്റിയ സാമൂഹിക ക്രമം സ്വാഭാവികമായി ഉണ്ടായിവരുന്നതാണെന്നും അമേരിക്കന്‍ ബുദ്ധിജീവികളുടെ ബുദ്ധിയില്‍ നേരത്തെ ഉദിച്ചതാണെന്നും കണ്ണടച്ച് വിശ്വസിക്കണമെങ്കില്‍ അതിരുകവിഞ്ഞ അമേരിക്കന്‍ പക്ഷാതിത്വം തന്നെ വേണം. നമ്മുടെ അക്കാദമിക ബുദ്ധിജീവികളില്‍ പലരും ബോധപൂര്‍വമോ അല്ലാതെയോ വെച്ചുപുലര്‍ത്തുന്നത് അതാണെന്ന് പറയേണ്ടിവന്നതില്‍ ഖേദമുണ്ട്. പക്ഷെ, അതാണ് വസ്തുത.
മാപ്പിംഗ് ദി ഗ്ലോബല്‍ ഫ്യൂച്ചറില്‍ നാല് ഭാഗങ്ങളാണുള്ളത്. ഒന്നാം ഭാഗത്ത് ആഗോളീകരണത്തിന്റെ വൈരുദ്ധ്യങ്ങളെപ്പറ്റിയും രണ്ടാം ഭാഗത്ത് ഉയര്‍ന്നുവരുന്ന ആഗോളശക്തികളെയും അതോടനുബന്ധിച്ച് മാറുന്ന രാഷ്ട്രതന്ത്രത്തിന്റെ ചിത്രത്തെപ്പറ്റിയും മൂന്നാം ഭാഗത്ത് ഭരണനിര്‍വഹണ രംഗത്തെ പുതിയ വെല്ലുവിളികളെപ്പറ്റിയും നാലാം ഭാഗത്ത് വ്യാപകമാകുന്ന അരക്ഷിതത്വത്തെപ്പറ്റിയുമാണ് പ്രതിപാദിച്ചിരിക്കുന്നത്. ഓരോ ഭാഗത്തിന്റെയും അന്ത്യത്തില്‍ ഓരോ കാല്‍പനിക ദൃശ്യരൂപങ്ങളും ഫിക്ഷന്‍ സിനാരിയോ എന്ന് തലക്കെട്ട് കൊടുത്തുകൊണ്ട് നല്‍കിയിട്ടുണ്ട്. 2020ന് മുമ്പ് ഉണ്ടാകാന്‍ പോവുന്ന നാല് സംഭവങ്ങളെ കുറിച്ച കാല്‍പനിക ദൃശ്യരൂപങ്ങളാണിവ. സ്വിറ്റ്‌സര്‍ലാന്റിലെ ദാവോസില്‍ വെച്ച് 2020ല്‍ നടക്കുന്ന വേള്‍ഡ് എക്കണോമിക്ക് ഫോറം വര്‍ഷാന്തയോഗത്തില്‍ ഫോറം മേധാവി യു.എസ് ഫെഡറല്‍ റിസര്‍ച്ചിന്റെ മുന്‍ ചെയര്‍മാന് സമര്‍പ്പിക്കുന്ന കത്താണ് ‘ദാവോസ് വേള്‍ഡ്’ എന്ന ഒന്നാമത്തെ സാങ്കല്‍പിക ദൃശ്യം. 2020ല്‍ യു.എന്‍ സെക്രട്ടറി ജനറല്‍ എഴുതുന്ന ലോകത്തിന്റെ നേതൃത്വം അമേരിക്കയുടെ കയ്യില്‍ തന്നെയാണെന്ന് ഉറപ്പുവരുത്തിക്കൊണ്ടുള്ള ‘പാക്ക്‌സ് അമേരിക്കാന’ എന്ന തലക്കെട്ടിലുള്ള സാങ്കല്‍പിക ഡയറിക്കുറിപ്പുകളാണ് രണ്ടാമത്തേത്. ബിന്‍ലാദന്റെ പൗത്രനായ സഈദ് മുഹമ്മദ് ബ്‌നു ലാദന്‍ 2020ല്‍ തന്റെ ഒരു കുടുംബ ബന്ധുവന് നിലനില്‍ക്കുന്ന ഖിലാഫത്തിനെ കുറിച്ച് എഴുതുന്ന സാങ്കല്‍പിക കത്താണ് ‘എ ന്യൂ കാലിഫേറ്റ്്’ എന്ന തലക്കെട്ട് നല്‍കിക്കൊണ്ടുള്ള മൂന്നാമത്തെ ദൃശ്യംശില്‍പം. മുസ്‌ലിം ലോകത്തിന് ആയുധം നല്‍കുന്ന ഒരു ആയുധ കള്ളക്കടത്തുകാരനും മറ്റൊരാളും തമ്മില്‍ 2020ല്‍ കൈമാറുന്നതായി സങ്കല്‍പിച്ചുകൊണ്ടുള്ള ഒരു കൂട്ടം ടെക്സ്റ്റ് മെസേജുകളാണ് ‘സൈക്കിള്‍ ദി ഫിയര്‍’ എന്ന തലക്കെട്ടിലുള്ള നാലാമത്തെ കാല്‍പനിക ദൃശ്യരൂപം.
നാല് കാല്‍പനിക ദൃശ്യരൂപങ്ങളിലും മുസ്‌ലിം ലോകവും മധ്യപൗരസ്ത്യ ദേശവുമാണ് വില്ലന്‍ റോളിലുള്ളതെന്ന വസ്തുത ശ്രദ്ധേയമാണ്. 2020 വരെയുള്ള ലോകക്രമത്തില്‍ അവരുടെ ശത്രുത സ്വാഭാവികമാണെന്ന മട്ടിലാണ് ഒന്നാമത്തെ കാല്‍പനിക ദൃശ്യമായ ദാവോസ് വേള്‍ഡ് മുന്നോട്ടുപോവുന്നത്. ഊര്‍ജവില വര്‍ധനവിലൂടെ സ്വയം പര്യാപ്തത നേടിക്കൊണ്ടുള്ള മധ്യപൗരസ്ത്യ ദേശങ്ങളുടെ നില്‍പാണ് ആഗോളവത്കരണത്തിലേക്കുള്ള പ്രയാണത്തിന് ലോകത്തിന്റെ മുന്നിലെ പ്രധാന തടസ്സമെന്ന രൂപത്തിലാണ് 2020ലെ വേള്‍ഡ് എക്കണോമിക്ക് ഫോറം മേധാവിയുടെ കത്ത് കാര്യങ്ങള്‍ വിശദീകരിച്ചിരിക്കുന്നത്. അമേരിക്കന്‍ ശാന്തി എത്രത്തോളം നിലനില്‍ക്കുമെന്ന ആശങ്ക പ്രകടിപ്പിച്ചുകൊണ്ടുള്ള യു.എന്‍ സെക്രട്ടറി ജനറലിന്റെ 2020ലെ ഡയറിക്കുറിപ്പുകളില്‍ ലോകത്തിന് എണ്ണ നല്‍കുന്ന രാജ്യങ്ങളില്‍ നിലനില്‍ക്കേണ്ട ശിആ-സുന്നി സന്തുലനമാണ് അമേരിക്കയും ചെനയും അടങ്ങുന്ന എണ്ണ ഉപഭോഗ രാഷ്ട്രങ്ങള്‍ക്കാവശ്യമെന്നും യൂറോപ്പും അമേരിക്കയോടൊപ്പം ഭീകരവിരുദ്ധ പോരാട്ടത്തില്‍ ഒരുമിക്കേണ്ടത് ആവശ്യമാണെന്നുമുള്ള മട്ടിലാണ് കാര്യങ്ങളുടെ അവതരണം. സഈദ് മുഹമ്മദ് ബ്ന്‍ ലാദന്‍ 2020ല്‍ എഴുതാന്‍ പോകുന്ന കത്തില്‍ കാര്യങ്ങള്‍ കുറേക്കൂടെ വ്യക്തമാണ്. വിവരസാങ്കേതിക വിദ്യയിലുണ്ടായ വളര്‍ച്ച മുസ്‌ലിം ലോകവും പാശ്ചാത്യലോകവും തമ്മിലുള്ള സംഘട്ടനത്തെ തീവ്രതരമാക്കുകയും അതുവഴി ഒരു ഖലീഫയുടെ ഉദയം ഉണ്ടാവുകയും ചെയ്യും. ലോകത്തുള്ള മുസ്‌ലിംകളോടെല്ലാം തന്റെ പിന്നില്‍ അണിനിരക്കുവാന്‍ ഖലീഫ ആഹ്വാനം ചെയ്യുമെങ്കിലും വ്യത്യസ്ത ദേശങ്ങളിലെ മുസ്‌ലിംകള്‍ അതിനോട് പ്രതികരിക്കുക വ്യത്യസ്തമായ രീതികളിലായിരിക്കും. സുന്നി-ശിആ സംഘട്ടനങ്ങള്‍ തീവ്രമാവുകയും അതുവഴി ലക്ഷങ്ങള്‍ അഭയാര്‍ഥികളായിത്തീരുന്ന അവസ്ഥ സംജാതമാവുകയും ചെയ്യും. അതുവഴി മുസ്‌ലിംകളുടെ ഭീകരവകല്‍കരണം സജീവമാവും. ഇങ്ങനെ പോകുന്നു കത്തിലെ വിവരങ്ങള്‍.
2020ന് മുന്‍പ്  മുസ്‌ലിം ലോകത്ത് നടക്കുമെന്ന് അമേരിക്ക 2004ല്‍ പ്രവചിച്ചതുപോലെ സ്വാഭാവികമായും ഉണ്ടായിവന്നതാണ് ഖലീഫയും അനുബന്ധ കാര്യങ്ങളും എന്നാണോ നാം മനസ്സിലാക്കേണ്ടത്? അതല്ല, എണ്ണയുടെ മേലുള്ള തങ്ങളുടെ അധീശത്വം നിലനിര്‍ത്താനായി സാമ്രാജ്യത്വം പടച്ചുകൊണ്ടിരിക്കുന്ന തന്ത്രങ്ങളിലൊന്നാണ് ഖലീഫയുടെ ആഗമനവും ഖിലാഫത്തിനുവേണ്ടിയുള്ള മുറവിളിയുമെന്നാണോ? സാമ്രാജ്യത്വത്തിന്റെ ചരിത്രവും അമേരിക്കന്‍ രേഖകളുടെ സൂക്ഷ്മമായ വായനയും നമുക്ക് മനസ്സിലാക്കി തരുന്നത് രണ്ടാമത്തേതിനാണ് സാധ്യതയെന്നാണ്. മുസ്‌ലിം ലോകത്തിന്റെ നാഡീമിടിപ്പുകളെ കുറിച്ച് ശരിക്കും പഠിച്ച ശേഷം അവര്‍ക്ക് തമ്മിലടിക്കുവാനും അവരെ തന്നെ ഉപയോഗിച്ച്  അവരെ നശിപ്പിക്കുവാനും വേണ്ടി സാമ്രാജ്യത്വം സൃഷ്ടിക്കുന്ന വലകളിലൊന്നാണ് പുതിയ ഖിലാഫത്ത് പ്രഖ്യാപനവും അതിനായുള്ള സമരാഹ്വാനങ്ങളുമെന്നുള്ള വസ്തുതയാണ് ഇവിടെ മറനീക്കി പുറത്തുവരുന്നത്. ശിആക്കളെ അമുസ്‌ലിംകളായി പ്രഖ്യാപിക്കുകയും അവരെയും പാശ്ചാത്യരെയും കൊന്നൊടുക്കുകയാണ് ലക്ഷ്യം എന്ന് പറയുകയും പിടിക്കപ്പെട്ടവരെ കഴുത്തറുത്ത് കൊല്ലുന്നതിന്റെ ദൃശ്യങ്ങള്‍ സോഷ്യല്‍ മീഡിയയിലൂടെ പ്രചരിപ്പിക്കുകയും തങ്ങളുടെ കലാപങ്ങള്‍ക്കിടയില്‍ യുദ്ധത്തടവുകാരാണെന്ന് പ്രഖ്യാപിച്ച് അടിമകളോട് പെരുമാറുന്നത് പോലെ അവരോടും പെരുമാറണമെന്ന് പരസ്യമായി വിധിക്കുകയും ചെയ്യുന്നവര്‍ കാരുണ്യവാനായ അല്ലാഹുവിന്റെ ദൂതനായ കാരുണ്യത്തിന്റെ പ്രവാചകന്‍ പഠിപ്പിച്ച മതത്തെ പ്രതിനിധീകരിക്കുവന്നവരാണെന്നു കരുതുവാന്‍ ന്യായമൊന്നുമില്ല. സാമ്രാജ്യത്വത്തിന്റെ തലച്ചോറില്‍ വിരിഞ്ഞ പദ്ധതികള്‍ നടപ്പാക്കി ഇസ്‌ലാമിനെയും മുഹമ്മദ് നബി(സ)യും വികലീകരിക്കുവാനുള്ള പരിശ്രമങ്ങളാണ് അറിയാതെ തങ്ങള്‍ ചെയ്തുകൊണ്ടിരിക്കുന്നതെന്ന് ഈ പാവം ‘ഏറുപടക്കങ്ങള്‍’ അറിയുന്നില്ലെന്നതാണ് ഏറെ സങ്കടകരം. ഇസ്‌ലാമിന്റെ ശത്രുക്കളുടെ ഏറുപടക്കങ്ങളാവുകയല്ല തങ്ങളുടെ ദൗത്യമെന്ന് തിരിച്ചറിയാനെങ്കിലും ഇവര്‍ക്കായെങ്കില്‍ എന്നു പ്രത്യാശിക്കുക മാത്രമാണ് വിവേകമതികള്‍ക്കു മുന്നിലുള്ള മാര്‍ഗം.
പരിശുദ്ധ ക്വുര്‍ആനും പ്രവാചകചര്യയുമാണ് ഇസ്‌ലാമിന്റെ അടിസ്ഥാന പ്രമാണങ്ങള്‍ എന്നും അവയെ മനസ്സിലാക്കേണ്ടത് അവ പ്രവാചകനില്‍(സ) നിന്ന് പഠിച്ചവര്‍ മനസ്സിലാക്കിയത് പോലെതന്നെയാകണമെന്നും തീരുമാനിച്ചുകഴിഞ്ഞാല്‍ മാറിവരുന്ന സാഹചര്യങ്ങള്‍ക്കനുസരിച്ച് മുസ്‌ലിംകളുടെ നിലപാടുകള്‍ മാറുന്ന സ്ഥിതിവിശേഷം ഉണ്ടാവുകയില്ല. ഇസ്‌ലാമിന്റെ ശത്രുക്കളുടെ കൈവശമുള്ള റിമോട്ട് കണ്‍ട്രോളുകളാല്‍ നയിക്കപ്പെടുന്നവരായിത്തീരുന്നത് ഈ തീരുമാനമില്ലാത്തവരോ അതിനെ തെറ്റിദ്ധരിച്ചവരോ ആണ്. പണ്ഡിതക്കുപ്പായം ഇട്ടവരുടെ വാക്കുകള്‍ക്കൊന്നും അപ്രമാദിത്വമില്ലെന്ന് മനസ്സിലാക്കുവാനും പ്രവാചകന്‍ പഠിപ്പിച്ചതില്‍ നിന്നും അനുചരന്മാര്‍ മനസ്സിലാക്കിയതാണ് തന്റെ മതം എന്ന് തീരുമാനിക്കുവാനും കഴിഞ്ഞാല്‍ മാത്രമേ ശത്രുക്കളുടെ സമര്‍ഥമായ കെണികളില്‍ നിന്ന് രക്ഷപ്പെടാന്‍ ഓരോരുത്തര്‍ക്കും കഴിയൂ. ഖിലാഫത്ത്, ഇമാമത്ത് തുടങ്ങിയ ശബ്ദങ്ങള്‍ കേള്‍ക്കുമ്പോഴേക്കും അതിനു പിന്നില്‍ തടിച്ചുകൂടുകയും ആത്മഹത്യാ സ്‌ക്വാഡുകളിലേക്ക് റിക്രൂട്ട് ചെയ്യപ്പെടുന്നവരായിത്തീരുകയും ചെയ്യുന്ന സ്ഥിതിയാണ് അതല്ലെങ്കില്‍ സംജാതമാവുക. കാരുണ്യത്തിയുടെയും ശാന്തിയുടെയും മതത്തിന്റെ ജീവിക്കുന്ന പ്രതിനിധികളായിത്തീരുകയും അത് പ്രബോധനം ചെയ്യാന്‍ ജീവിതത്തെ സമര്‍പിക്കുകയുമാണ് ഖിലാഫത്തിന്റെ അര്‍ഥം പ്രവാചകനില്‍(സ) നിന്ന് പഠിച്ചവര്‍ ചെയ്യുക. അത്തരക്കാരെയാണ് ഇന്ന് ലോകത്തിനാവശ്യം. ശത്രുക്കള്‍ ഏറ്റവും കൂടുതല്‍ ഭയപ്പെടുന്നത് അത്തരക്കാരെയാണെന്ന് സാമ്രാജത്വത്തിന്റെ രേഖകളെ വരികള്‍ക്കിടയിലൂടെ വായിച്ചാല്‍ ബോധ്യമാവും. കാരുണ്യത്തിന്റെ മതം ജനങ്ങള്‍ക്കെത്തിക്കുന്ന ദൗത്യത്തില്‍ പങ്കാളികളാകുവാന്‍ സര്‍വശക്തന്‍ നമ്മെ അനുഗ്രഹിക്കട്ടെ (ആമീന്‍).

Read More

‘ഫിത്‌ന’കളോടുള്ള സമീപനം

പരീക്ഷ, പരീക്ഷണം, കുഴപ്പം എന്നീ അര്‍ത്ഥകല്‍പനകളുള്ള ഫ,ത,ന ത്രയാക്ഷരങ്ങളില്‍നിന്ന്‌ നിര്‍ധരിക്കപ്പെട്ട ‘ഫിത്‌ന’യെന്ന പദം പരീക്ഷ, പരീക്ഷണം,കുഴപ്പം, സമ്പത്ത്‌, മക്കള്‍, അവിശ്വാസം, ജനങ്ങള്‍ക്കിടയിലുള്ള ചേരിതിരിവ്‌, കത്തിച്ചുകളയുക എന്നീ അര്‍ത്ഥങ്ങളില്‍ പ്രയോഗിക്കാറുണ്ടെന്ന്‌ പ്രസിദ്ധ അറബി ഭാഷാ നിഘണ്ടുവായ ലിസാനുല്‍ അറബ്‌ വ്യക്തമാക്കുന്നുണ്ട്‌. പരീക്ഷണം (29:2), വഴി മുടക്കുകയും തെറ്റിച്ചു കളയുകയും ചെയ്യുക, (5:49), പീഢനം (16:110), കുഴപ്പം (57:14), മര്‍ദനം (85:10) എന്നീ അര്‍ത്ഥങ്ങളിലെല്ലാം ക്വുര്‍ആന്‍ ഫിത്‌നയെ പ്രയോഗിച്ചത്‌ കാണാനാകും. സമൂഹത്തില്‍ കുഴപ്പങ്ങളുണ്ടാവുകയും ശാരീരികവും മാനസികവുമായി സത്യവിശ്വാസികള്‍ പീഡിപ്പിക്കപ്പെടുകയും ചെയ്യുമ്പോള്‍ അവ അല്ലാഹുവില്‍നിന്നുള്ള പരീക്ഷണങ്ങളാണെന്ന്‌ മനസ്സിലാക്കുകയും പതറുകയോ പിഴയ്‌ക്കുകയോ ചെയ്യാതെ ക്ഷമിക്കുകയും അനിവാര്യമായ അവസരങ്ങളില്‍ മാത്രം പ്രമാണങ്ങള്‍ പഠിപ്പിച്ചുതന്ന രീതിയില്‍ പ്രതികരിക്കുകയും ചെയ്യേണ്ടവനാണ്‌ മുസ്ലിം. കുഴപ്പങ്ങളും നാശങ്ങളുമുണ്ടാകുമ്പോള്‍ അവയോട്‌ എങ്ങനെ പ്രതികരിക്കുന്നുവെന്നതാണ്‌ മുസ്ലിമിനെ സംബന്ധിച്ചിടത്തോളമുള്ള പരീക്ഷണം. അല്ലാഹുവെയും അന്ത്യദിനത്തെയും പ്രതീക്ഷിക്കുകയും അല്ലാഹുവിനെ ധാരാളമായി ഓര്‍മിക്കുകയും ചെയ്യുന്നവര്‍ക്കുള്ള ഉത്തമ മാതൃകയായി പരിശുദ്ധ ക്വുര്‍ആന്‍ (33:21) ഉയര്‍ത്തിക്കാണിച്ച പ്രവാചകന്റെ(സ) മൊഴികളും ചെയ്‌തികളും തന്നെയാകണം കുഴപ്പങ്ങളുടെ സന്ദര്‍ഭങ്ങളിലും മുസ്ലിംകളെ വഴി നടത്തേണ്ടത്‌. കുഴപ്പക്കാര്‍ ഉപയോഗിക്കുന്ന ഭാഷയുടെ ശൈലിയും രീതിയും രൂപവും തന്നെയാണ്‌ ഒരാള്‍ തന്റെ പ്രതികരണമായി സ്വീകരിക്കുന്നതെങ്കില്‍ ആ രംഗത്തെ പരീക്ഷണത്തില്‍ അയാള്‍ പരീജയപ്പെടുന്നുവെന്നാണ്‌ അര്‍ത്ഥം.
മാന്യതയും വിനയവും കൈവിടാതിരിക്കുക: പ്രവാചകന്റെ (സ) വിനയത്തോടും മാന്യതയോടു കൂടെയുമുള്ള പെരുമാറ്റത്തെ പ്രശംസിച്ചുകൊണ്ട്‌ ക്വുര്‍ആന്‍ പറയുന്നത്‌ ‘നീ പരുഷസ്വഭാവിയും കഠിന ഹൃദയനുമായിരുന്നുവെങ്കില്‍ നിന്റെ ചുറ്റില്‍നിന്നും അവര്‍ പിരിഞ്ഞു പോയേക്കുമായിരുന്നു’(3:159) വെന്നാണ്‌ എന്ന വസ്‌തുത ഏറെ ശ്രദ്ധേയമാണ്‌. ഉഹ്‌ദില്‍വെച്ച്‌ തന്റെ നിര്‍ദേശത്തെ അവഗണിക്കുകയും സമരാര്‍ജിത സമ്പത്തിന്റെ ശേഖരണത്തില്‍ അമിതാവേശം കാണിക്കുകയും യുദ്ധരംഗത്ത്‌ പരാജയമുണ്ടായപ്പോള്‍ പ്രവാചകനെ (സ) വിട്ട്‌ പിന്‍തിരിഞ്ഞോടുകയും ചെയ്‌തവരോടുള്ള പ്രവാചക പെരുമാറ്റത്തെക്കുറിച്ച്‌ പരാമര്‍ശിക്കവെയാണ്‌ ക്വുര്‍ആന്‍ ഇക്കാര്യം എടുത്തുപറയുന്നതെന്നുകൂടി മനസ്സിലാകുമ്പോഴാണ്‌ ആ മഹത്‌വ്യക്തിത്വത്തിന്റെയും പെരുമാറ്റം എത്രത്തോളം മാന്യമായിരുന്നുവെന്ന്‌ ബോധ്യപ്പെടുക. “ഏതു കാര്യത്തെയും വിനയം മനോഹരമാക്കിത്തീര്‍ക്കും; വിനയത്തിന്റെ അഭാവം എന്തിനെയും മ്ലേച്ഛമാക്കിത്തീര്‍ക്കും.” (സ്വഹീഹു മുസ്ലിം) എന്ന പ്രവാചകവചനം നല്‍കുന്ന വെളിച്ചമായിരിക്കണം ഫിത്‌നകള്‍ക്കു നടുവില്‍ ജീവിക്കുന്ന മുസ്ലിമിന്‌ വഴി കാണിക്കേണ്ടത്‌. മാന്യതയില്ലാത്ത പെരുമാറ്റങ്ങളും വിനയമില്ലാത്ത വര്‍ത്തമാനങ്ങളും കുഴപ്പങ്ങളെ തീവ്രമാക്കുക മാത്രമെയുള്ളു. അഭിപ്രായവ്യത്യാസങ്ങള്‍ മൂലമുണ്ടാകുന്ന കുഴപ്പത്തില്‍ തന്റേതല്ലാത്ത അഭിപ്രായങ്ങളുള്‍ക്കൊള്ളുന്നവരോട്‌ മാന്യവും വിനയാന്വിതവുമായി പെരുമാറുവാനും വിയോജിക്കുന്നതെവിടെയെന്ന്‌ അവധാനതയോടെ പറഞ്ഞുകൊടുക്കുവാനും സന്നദ്ധമാവുകയാണെങ്കില്‍ തന്നെ കുഴപ്പത്തിന്റെ തീവ്രതയില്ലാതാകും. “സംയമനം, അവധാനത എന്നീ അല്ലാഹു ഇഷ്‌ടപ്പെടുന്ന രണ്ട്‌ സ്വഭാവങ്ങള്‍ താങ്കളിലുണ്ട്‌” എന്ന്‌ അശ്ശാജ്‌ അബ്‌ദുല്‍ഖൈസി(റ) നോട്‌ പ്രവാചകന്‍ (സ) പറഞ്ഞതില്‍നിന്ന്‌ നമുക്കെല്ലാം പഠിക്കുവാന്‍ നിരവധി പാഠങ്ങളുണ്ട്‌. “സല്‍സ്വഭാവത്തിന്റെ പൂര്‍ത്തീകരണത്തിനുവേണ്ടിയാണ്‌ ഞാന്‍ നിയോഗിക്കപ്പെട്ടിരിക്കുന്നത്‌.” (മുവത്വ,അഹ്‌മത്‌) എന്നു പഠിപ്പിച്ച പ്രവാചകന്റെ (സ) അനുയായികള്‍ എത്ര വലിയ പരീക്ഷണത്തിന്‌ വിധേയമായാലും തങ്ങളില്‍ സ്വാഭാവികമായി നിലനില്‍ക്കേണ്ട സ്വഭാവഗുണങ്ങളൊന്നും തന്നെ കൈവിട്ടുപോകാതിരിക്കുവാന്‍ പ്രത്യേകം ശ്രദ്ധിക്കേണ്ടതുണ്ട്‌.

ക്ഷമിക്കുക: അല്ലാഹുവിന്റെ പരീക്ഷണങ്ങളുണ്ടാകുമ്പോള്‍ ‘ക്ഷമിക്കുന്നവര്‍ക്ക്‌ സന്തോഷവാര്‍ത്തയറിയിക്കുക’ (2:155) യെന്ന ക്വുര്‍ആനിക നിര്‍ദേശം ക്ഷമയുടെ പ്രാധാന്യത്തെയും അനിവാര്യതയെയും കുറിച്ച്‌ വ്യക്തമാക്കുന്നുണ്ട്‌. “നിങ്ങള്‍ക്കുശേഷം ക്ഷമ അനിവാര്യമായിത്തീരുന്ന നാളുകള്‍ വരാനുണ്ട്‌; അന്ന്‌ ക്ഷമിക്കുകയെന്നാല്‍ എരിഞ്ഞുകൊണ്ടിരിക്കുന്ന തീക്കട്ടയില്‍ കൈവെക്കുന്നതു പോലെയായിരിക്കും അക്കാലത്ത്‌ അല്ലാഹുവിന്റെ കല്‍പനകള്‍ മുറുകെ പിടിക്കുന്നവര്‍ക്ക്‌ (സമാധാനകാലത്ത്‌) അക്കാര്യം ചെയ്‌ത അമ്പതുപേരുടെ പ്രതിഫലത്തിനു തുല്യമായ പ്രതിഫലമുണ്ടാവും” (അബൂദാവൂദ്‌, ഇബ്‌നുമാജ,ഇമാം അല്‍ബാനി സ്വഹീഹാണെന്ന്‌ പറഞ്ഞത്‌ സില്‍സിലത്തു സ്വഹീഹ്‌ ഹദീഥ്‌ 494) എന്ന്‌ അബൂഥഅ്‌ലബ അല്‍ ഖുശാനിയോട്‌ പ്രവാചകന്‍(സ) പറഞ്ഞതായി വ്യക്തമാക്കുന്ന ഹദീഥ്‌ ഫിത്‌നകളുണ്ടാവുന്ന സന്ദര്‍ഭങ്ങളില്‍ ക്ഷമിക്കുകയും അല്ലാഹുവിന്റെ പാശം മുറുകെ പിടിക്കുകയും ചെയ്യുന്നവര്‍ക്ക്‌ നല്‍കുന്ന പ്രതീക്ഷ അപാരമാണ്‌. ശത്രുക്കളാല്‍ പീഡിപ്പിക്കപ്പടുമ്പോള്‍ മാത്രമല്ല, അനുയായികളാല്‍ അവമതിക്കപ്പെടുമ്പോഴും ക്ഷമയോടെത്തന്നെ നിലനില്‍ക്കണമെന്ന പാഠമാണ്‌ പ്രവാചകജീവിതം വിശ്വാസികള്‍ക്ക്‌ നല്‍കുന്നത്‌. ഹൂദൈബിയ സന്ധിയുടെ സന്ദര്‍ഭത്തില്‍, അല്ലാഹുവിന്റെ കല്‍പനയനുസരിച്ചുകൊണ്ട്‌ യുദ്ധമില്ലാ കരാറില്‍ ഒപ്പ്‌വെക്കുകയും മക്കാമുശ്‌രിക്കുകള്‍ക്ക്‌ ഏകപക്ഷീയമായി അനുകൂലമെന്ന്‌ തോന്നുന്ന കരാര്‍വ്യവസ്ഥകളെ അംഗീകരിക്കുകയും ചെയ്‌ത പ്രവാചക നടപടിയില്‍ അനുയായികള്‍ ഒന്നടങ്കം പ്രതിഷേധിക്കുകയും അനുസരണക്കേടിന്റെ പടി കയറാന്‍ തുടങ്ങുകയും ചെയ്‌ത സന്ദര്‍ഭത്തില്‍ ക്ഷമയോടെ നില്‍ക്കുകയും ദൈവവചനങ്ങള്‍ ഓതിക്കേള്‍പ്പിച്ച്‌ അനുയായികള്‍ക്ക്‌ സാന്ത്വനം നല്‍കുകയും ചെയ്‌ത പ്രവാചകനിലപാട്‌ നല്‍കുന്ന സന്ദേശം ഉള്‍ക്കൊള്ളാന്‍ കഴിഞ്ഞാല്‍ ഏത്‌ പ്രതികൂലമായ പരീക്ഷണഘട്ടത്തിലും ക്ഷമയോടെ നില്‍ക്കാന്‍ വിശ്വാസികള്‍ക്ക്‌ സാധിക്കും. ഹജ്ജാജ്‌ബ്‌നു യൂസുഫിന്റെ പീഢനങ്ങളെക്കുറിച്ച്‌ പരാതി പറഞ്ഞവരോട്‌ പ്രവാചകവചനമുദ്ധരിച്ചു കൊണ്ട്‌ ‘ക്ഷമിക്കുക’യെന്ന്‌ ഉപദേശിച്ച അനസുബ്‌നു മാലിക്കിന്റെ നടപടിയില്‍ (സ്വഹീഹുല്‍ ബുഖാരി) എക്കാലത്തെയും മുസ്ലിംകള്‍ക്ക്‌ മാതൃകയുണ്ട്‌. “നീയുമായി ബന്ധം വിഛേദിച്ചവരുമായി നീ ബന്ധം സ്ഥാപിക്കുക; നിന്നെ അവഗണിച്ചവന്‌ നീ നല്‍കുക; നിന്നോട്‌ തെറ്റു ചെയ്‌തവനോട്‌ നീ ക്ഷമിക്കുക; നിന്റെ നാവിനെ നിയന്ത്രിക്കുക; നിന്റെ പാപങ്ങളെയോര്‍ത്ത്‌ നീ കണ്ണീര്‍ പൊഴിക്കുക; നീ നിന്റെ വീട്ടില്‍ അടങ്ങിക്കഴിയുക; എന്നിങ്ങനെ ഉഖ്‌ബത്തുബ്‌നു അംറിന്‌(റ) പ്രവാചകന്‍(സഃ നല്‍കിയ നിര്‍ദേശങ്ങള്‍ (അഹ്‌മദ്‌ സില്‍സിലത്തുസ്‌ സ്വഹീഹ്‌, ഹദീഥ്‌ 1699) പ്രാവര്‍ത്തികമാക്കുവാന്‍ സന്നദ്ധമായാല്‍ കുഴപ്പങ്ങള്‍ക്ക്‌ നടുവില്‍ അവയ്‌ക്ക്‌ ഊര്‍ജ്ജം നല്‍കുന്നവരായിത്തീരുന്ന ഗതികേടിലേക്ക്‌ ആരും ആപതിക്കുകയില്ലെന്ന്‌ ഉറപ്പാണ്‌.

നീതിക്കുവേണ്ടി നിലനില്‍ക്കുക:
സ്വന്തത്തിനും സ്വന്തക്കാര്‍ക്കും ബന്ധുക്കള്‍ക്കുമെതിരാണ്‌ നീതിയെങ്കില്‍ പോലും നീതിക്കുവേണ്ടി നിലനില്‍ക്കേണ്ടവനാണ്‌ മുസ്ലിംകള്‍ എന്ന്‌ നിഷ്‌കര്‍ഷിക്കുന്ന ക്വര്‍ആന്‍ വചനം അവസാനിക്കുന്നത്‌ “അതിനാല്‍ നീതി പാലിക്കാതെ തന്നിഷ്‌ടങ്ങളെ പിന്‍പറ്റരുത്‌; നിങ്ങള്‍ വളച്ചൊടിക്കുകയോ ഒഴിഞ്ഞു മാറുകയോ ചെയ്യുന്ന പക്ഷം തീര്‍ച്ചയായും നിങ്ങള്‍ പ്രവര്‍ത്തിക്കുന്നതിനെക്കുറിച്ചെല്ലാം സൂക്ഷമമായി അറിയുന്നവനാകുന്നു അല്ലാഹു.” (4:135) എന്നു പറഞ്ഞുകൊണ്ടാണെന്ന കാര്യം ശ്രദ്ധേയമാണ്‌. “ഒരു കൂട്ടരോടും നിങ്ങളുടെ വിരോധം അവരോട്‌ നീതി ചെയ്യുന്നതിനുള്ള പ്രചോദകമായിരിക്കരുത്‌.” (5:8) എന്ന ക്വുര്‍ആന്‍ കല്‍പന അക്ഷരംപ്രതി പാലിക്കുവാന്‍ മുസ്ലിംകള്‍ സന്നദ്ധമാവുകയാണെങ്കില്‍ ഒരു വിധം സാമൂഹിക കുഴപ്പങ്ങളെല്ലാം ഇല്ലാതെയാകുമെന്നുറപ്പാണ്‌. തന്റെ കക്ഷിക്കുവേണ്ടി അല്‍പം അനീതിയൊക്കെ ആകാമെന്ന വിചാരവും സ്വന്തം പാര്‍ട്ടിയുടെ വിജയത്തിന്‌ അനീതിക്കൊപ്പം നില്‍ക്കാം എന്ന ആശയവുമാണ്‌ ഏത്‌ അവസരത്തിലും നീതിക്കൊപ്പമാകണം മുസ്ലിം നിലിനില്‍ക്കേണ്ടതെന്നു പഠിപ്പിക്കുന്ന ക്വുര്‍ആനികാശയത്തിന്‌ പകരമായി പലരുടെയും മനസ്സുകളെ ഭരിക്കുന്നത്‌. താന്‍ അനീതി ചെയ്‌തിട്ടുണ്ടെന്ന്‌ വെളിപ്പെടുത്തപ്പെട്ടപ്പോള്‍ അത്‌ സര്‍വാത്മനാ സ്വീകരിക്കുകയും പ്രതിക്രിയ സ്വീകരിക്കാന്‍ സന്നദ്ധനായി കുപ്പായമൂരി നിന്നുകൊടുക്കുകയും ചെയ്‌ത പ്രവാചകമാതൃക പ്രസംഗിക്കുവാന്‍ മാത്രമുള്ളതല്ലെന്ന്‌ മനസ്സിലാക്കുവാന്‍ മുസ്ലിംകള്‍ സന്നദ്ധമാണെങ്കില്‍ ഫിത്‌നകളുടെ വക്താക്കളോ ഗുണഭോക്താക്കളോ ആകുന്ന ആപതനത്തില്‍നിന്ന്‌ രക്ഷപ്പെടാന്‍ അവര്‍ക്ക്‌ സാധിക്കും. “എന്റെ മകള്‍ ഫാത്വിമ കളവു നടത്തിയാല്‍ ഞാന്‍ അവളുടെ കരം ഛേദിക്കുകതന്നെ ചെയ്യും” (സ്വഹീഹുല്‍ ബുഖാരിഃ എന്ന്‌ പ്രഖ്യാപിച്ച പ്രവാചകന്റെ (സ) മാനസികാവസ്ഥ വളര്‍ത്തിയെടുക്കാന്‍ സാധിച്ചാല്‍ ഫിത്‌നകള്‍ക്ക്‌ കുഴലൂത്ത്‌ നടത്തുന്നവരില്‍ ഉള്‍പ്പെടാതിരിക്കുവാന്‍ എല്ലാവര്‍ക്കും കഴിയും. അല്ലാഹു അനുഗ്രഹിക്കട്ടെ (ആമീന്‍). 

Read More

ഇന്റര്‍നെറ്റ്‌; പ്രബോധകര്‍ ശ്രദ്ധിക്കേണ്ടത്‌

വൈജ്ഞനികരംഗത്ത്‌ കുതിച്ചുചാട്ടം നടത്തിക്കൊണ്ടിരിക്കുന്ന ആധുനിക മനുഷ്യന്റെ ചരിത്രത്തിലെ ഒരു നാഴികക്കല്ലാണ്‌ ഇന്റര്‍നെറ്റിന്റെ ആഗമനമെന്ന കാര്യത്തില്‍ സംശയമൊന്നും തന്നെയില്ല. അമേരിക്കയിലെ ഡിഫന്‍സ്‌ അഡ്‌വാന്‍സ്‌ഡ്‌ റിസര്‍ച്ച്‌ ഏജന്‍സി, വിവര കൈമാറ്റത്തിനു വേണ്ടി 1969 മുതല്‍ ഉപയോഗിക്കാനാരംഭിച്ചിരുന്ന കംപ്യൂട്ടര്‍ ശൃംഖലയായ ഇന്റര്‍നെറ്റ്‌ പ്രോട്ടോക്കോള്‍ സ്യൂട്ടിനെ (TCP/IP) ആധാരമാക്കി ലോക വ്യാപകമായ വൈജ്ഞാനിക വിനിമയത്തിനു പറ്റുന്ന ഇന്റര്‍നെറ്റ്‌ എന്ന സംവിധാനം 1982ല്‍ പ്രവര്‍ത്തനക്ഷമമായതു മുതല്‍ ആഗോളഗ്രാമമെന്ന സങ്കല്‍പം സാക്ഷാല്‍ക്കരിക്കപ്പെടുകയായിരുന്നു. ലോകത്തെവിടെയും സൂക്ഷിക്കപ്പെട്ടിരിക്കുന്ന വിജ്ഞാന ഭണ്ഡാരങ്ങള്‍ സ്വന്തം മേശപ്പുറത്തിരുന്ന്‌ തുറക്കാനാവുകയെന്ന അത്ഭുതലോകത്തെ ആലീസിനു പോലും കഴിയാതിരുന്ന അത്ഭുതമാണ്‌, ഇന്റര്‍നെറ്റു വഴി, ഏതൊരു സാധാരണക്കാരനും കഴിയുമെന്ന അവസ്ഥ സംജാതമാക്കിയത്‌. 2011 ഡിസംബര്‍ 31ലെ കണക്കുകള്‍ പ്രകാരം ലോകജനസംഖ്യയുടെ 32.7ശതമാനം (226.7 കോടി) ഇന്റര്‍നെറ്റ്‌ ഉപയോഗിക്കുന്നവരാണ്‌ (Internet usage statistics-www.internetworldstats.com). 2000 ത്തില്‍ നിന്ന്‌ 2011 ലെത്തുമ്പോള്‍ ഇന്റര്‍നെറ്റ്‌ ഉപയോഗിക്കുന്നവരുടെ എണ്ണത്തില്‍ 528.1 ശതമാനം വര്‍ധനവുണ്ടായിട്ടുണ്ട്‌. എന്ന വസ്‌തുത അത്‌ എത്രത്തോളം വലിയ സ്വാധീനമാണ്‌ ജനങ്ങളില്‍ ഉണ്ടാക്കുന്നത്‌ എന്ന്‌ വ്യക്തമാക്കുന്നുണ്ട്‌.
2011 ഡിസംബറിലെ കണക്കുകള്‍ പ്രകാരം 36,68,48,493 വെബ്‌ സൈറ്റുകളും 314.6 കോടി ഇ.മെയില്‍ വിലാസങ്ങളുമുള്ള വലിയൊരു ലോകമാണ്‌ ഇന്റര്‍നെറ്റിന്റേത്‌. വൈജ്ഞാനിക വിസ്‌ഫോടനമെന്നാണ്‌ ഇന്റര്‍നെറ്റിന്റെ ലോകത്തെക്കുറിച്ച്‌ പറയാറുള്ളതെങ്കിലും അത്‌ ഇന്ന്‌ ഏറ്റവുമധികം ഉപയോഗിക്കപ്പെടുന്നത്‌. വളരുന്ന തലമുറയെ തിന്‍മകളിലേക്ക്‌ നയിക്കുവാനും തലച്ചോറിനെ വാണിജ്യവല്‍ക്കരിക്കുന്നതിനും വേണ്ടിയാണ്‌. ആകെയുള്ള വെബ്‌സൈറ്റുകളില്‍ പന്ത്രണ്ട്‌ ശതമാനത്തോളം പച്ചയായ ലൈംഗികത പ്രദര്‍ശിപ്പിക്കുന്നവയാണ്‌. പോര്‍ണോഗ്രാഫിക്‌ വെബ്‌സൈറ്റുകള്‍ എന്ന്‌ സ്വയം വിളിക്കുന്നവ കൂടാതെ എന്റര്‍ടൈന്‍മെന്റും, മാട്രിമോണിയല്‍, ഡേറ്റിംഗ്‌ തുടങ്ങിയ തലക്കെട്ടിനു കീഴെ ലൈംഗികതയിലേക്കു നയിക്കുന്ന സൈറ്റുകളുടെ എണ്ണം ഇതിലും എത്രയോ അധികമാണ്‌. വെബ്‌സൈററുകളില്‍ സെര്‍ച്ച്‌ ചെയ്യപ്പെടുന്നതില്‍ 25 ശതമാനവും പോര്‍ണോഗ്രാഫിയാണ്‌ എന്ന കണക്ക്‌ നല്‍കുന്ന ഭീഷണമായ അറിവ്‌ വിജ്ഞാനവിസ്‌ഫോടനമല്ല, പ്രത്യുത ധാര്‍മികത്തകര്‍ച്ചയാണ്‌ ഇത്‌ കൊണ്ട്‌ ഉണ്ടാവാന്‍ പോകുന്നത്‌ എന്ന്‌ വ്യക്തമാക്കുന്നുണ്ട്‌. ഇന്റര്‍നെറ്റ്‌ ഉപയോഗിക്കുന്ന 15 മുതല്‍ 17 വരെ വയസുകള്‍ക്കിടയിലുള്ളവരില്‍ 80 ശതമാനം പോര്‍ണോഗ്രാഫി സൈറ്റുകള്‍ സന്ദര്‍ശിക്കുന്നവരാണെന്നും അത്തരക്കാര്‍ ഇത്തരം സൈറ്റുകള്‍ സന്ദര്‍ശിക്കുവാന്‍ തുടങ്ങുന്നത്‌ ശരാശരി പതിനൊന്നാം വയസ്സിലാണെന്നുമുള്ള സ്ഥിതി വിവരക്കണക്കുകള്‍ ഞെട്ടിപ്പിക്കുന്നവയാണ്‌. ഓരോ സെക്കന്റിലും 28,258 പേര്‍ ഇന്റര്‍നെറ്റ്‌ പോര്‍ണോഗ്രഫി ആസ്വദിക്കുമ്പോള്‍ അത്‌ വിറ്റു കാശാക്കുന്നവരുടെ മേശവലിപ്പിലെത്തുന്നത്‌ 3075.64 കോടിയോളം ഡോളറാണെന്നാണ്‌ കണക്ക്‌. ഓരോ ദിവസവും 27 കോടിയോളം ഡോളര്‍ (1328 കോടി ഇന്ത്യന്‍ രൂപ) ക്യാമറക്ക്‌ മുന്നില്‍ വെച്ച്‌ തുണിയഴിക്കുന്നവര്‍ സമ്പാദിക്കുമ്പോള്‍ സമൂഹത്തിന്റെ ധാര്‍മികതയാണ്‌ യഥാര്‍ഥത്തില്‍ അഴിഞ്ഞുപോകുന്നതെന്നും അതുവഴി ഉണ്ടാകാന്‍ പോകുന്ന ദുരന്തം കണക്കു കൂട്ടാവുന്നതിലുമപ്പുറമാണെന്നുമുള്ള വസ്‌തുതകള്‍ എല്ലാവരും വിസ്‌മരിക്കുകയാണ്‌ ചെയ്യുന്നത്‌. ഒരുപാട്‌ നന്മകള്‍ക്ക്‌ സാധ്യതകളുള്ള ഇന്റര്‍നെറ്റിന്റെ ലോകം തിന്‍മകളുടെ കൂത്തരങ്ങായിത്തീരുന്നതാണ്‌ ഇവിടെ നാം കാണുന്നത്‌.
ഇന്റര്‍നെറ്റിലൂടെയുള്ള ഇസ്ലാമികപ്രബോധന സാധ്യതകളെ മുസ്‌ലിംലോകം വേണ്ടത്ര ഉപയോഗപ്പെടുത്തിയിട്ടില്ലെങ്കിലും, ശ്രദ്ധേയമായ ചില കാല്‍വെപ്പുകള്‍ നടത്തിയിട്ടുണ്ടെന്ന വസ്‌തുത എടുത്തു പറയാതെ വയ്യ. അറബി ഭാഷ മനസ്സിലാക്കാനാവുന്നവര്‍ക്ക്‌ ഇസ്ലാമിക പ്രമാണങ്ങളുടെയും പണ്ഡിതന്‍മാരുടെ ഫത്‌വകളുടെയും പ്രഭാഷണങ്ങളുടെയും വ്യാഖ്യാനങ്ങളുടെയുമെല്ലാം ഒരു ബൃഹത്തായ ശേഖരം തന്നെ ഇന്റര്‍നെറ്റിലൂടെ ലഭിക്കും. ഒരു മഹാപണ്ഡിതനാകുവാനാവശ്യമായ ഇസ്ലാമിക ഗ്രന്ഥങ്ങളുടെ ശേഖരം ഇന്റര്‍നെറ്റിലുണ്ട്‌. പല സൈറ്റുകളിലും സെര്‍ച്ച്‌ സംവിധാനമുള്ളതിനാല്‍ അന്വേഷണ വിഷയവുമായി ബന്ധപ്പെട്ട പരാമര്‍ശങ്ങള്‍ എവിടെയാണുള്ളതെന്ന്‌ കൃത്യമായി കണ്ടെത്തുവാനും പരിശേധിച്ച്‌ പഠിക്കുവാനും അതുവഴി സാധിക്കും. മരണപ്പെട്ടവരും ജീവിച്ചിരിക്കുന്നവരുമായ പണ്ഡിതന്‍മാരുടെ ഫത്‌വകള്‍, ആധുനിക പ്രശ്‌നങ്ങളില്‍ എന്തു നിലപാട്‌ സ്വീകരിക്കണമെന്നതിന്‌ മുസ്‌ലിംകള്‍ക്ക്‌ വഴികാട്ടിയായി ഭവിക്കുന്നുണ്ട്‌. എന്നാല്‍ അറബിയല്ലാത്ത ഭാഷകളില്‍ വേണ്ടത്ര ശ്രദ്ധിക്കുവാന്‍ ഇന്റര്‍നെറ്റിലൂടെ ഇസ്‌ലാമികപ്രബോധനം നിര്‍വഹിക്കുവാന്‍ ശ്രമിക്കുന്നവര്‍ക്ക്‌ കഴിഞ്ഞിട്ടില്ല. ഇംഗ്ലീഷില്‍ ശ്രദ്ധേയമായ ചില കാല്‍വെപ്പുകള്‍ നടത്തിയിട്ടുണ്ടെങ്കിലും ഇസ്‌ലാം വിരുദ്ധവും ഇസ്‌ലാമിനെക്കുറിച്ച തെറ്റുധാരണകള്‍ സൃഷ്‌ടിക്കുന്നതുമായ സൈറ്റുകളുമായി താരതമ്യം ചെയ്യുമ്പോള്‍ ഇസ്‌ലാമികപ്രബോധന സൈറ്റുകളല്ലാത്തവ കൂടി നിര്‍വഹിക്കുന്ന സേവനം മൊത്തത്തില്‍ കുറവു തന്നെയാണ്‌. എങ്കിലും ഇന്റര്‍നെറ്റിലൂടെയുള്ള ഇസ്‌ലാം വിമര്‍ശനങ്ങള്‍ക്ക്‌ മൊത്തത്തില്‍ മറുപടി പറയുകയും മുസ്‌ലിംകളെ ഇവ്വിഷയകമായി സജ്ജീകരിക്കുകയും ചെയ്യുന്നതിന്‌ ഇംഗ്ലിഷ്‌ ഇസ്‌ലാമിക്‌ സൈറ്റുകള്‍ക്ക്‌ സാധിക്കുന്നുണ്ട്‌. ഇസ്‌ലാമിനെ തെറി പറയുകയും തമസ്‌കരിക്കുകയും ചെയ്യുന്നതിനായി ഇന്റര്‍നെറ്റില്‍ കളിക്കുന്ന മലയാളികള്‍ പടച്ചു വിടുന്ന സൈറ്റ്‌-ബ്ലോഗ്‌ ആഭാസങ്ങളുമായി താരതമ്യം ചെയ്യുമ്പോള്‍ ഇസ്‌ലാമിനെ പരിചയപ്പെടുത്തുകയും വിമര്‍ശനങ്ങള്‍ക്ക്‌ മറുപടി കണ്ടെത്തുകയും ചെയ്യുന്നതിനുവേണ്ടി സംവിധാനിക്കപ്പെട്ട മലയാളം സൈറ്റുകള്‍ ഉയര്‍ന്ന നിലവാരം പുലര്‍ത്തുന്നവ തന്നെയാണ്‌. മലയാളത്തിന്റെ വിഫുലമായ ഉപയോഗവും പ്രവാസിസമൂഹമെന്ന നിലയ്‌ക്ക്‌ അന്താരാഷ്‌ട്രീയമായി സ്വാധീനിക്കുവാനുള്ള ശേഷിയും പരിഗണിക്കുമ്പോള്‍ ഈ രംഗത്തെ മലയാളീ മുസ്‌ലിം സാന്നിധ്യം വേണ്ടത്രയായിട്ടില്ലെന്നതു തന്നെയാണ്‌ യാഥാര്‍ത്ഥ്യം.

ഇന്റര്‍നെറ്റ്‌ സൈറ്റുകളിലൂടെയും ബ്ലോഗുകളിലൂടെയും ചാറ്റ്‌ റൂമുകളിലൂടെയും ബൈലക്‌സ്‌ലൂടെയും യൂട്യൂബിലൂടെയുമെല്ലാം ഇസ്‌ലാമിന്റെ സന്ദേശം മറ്റുള്ളവര്‍ക്ക്‌ എത്തിച്ചുകൊടുക്കുവാന്‍ വേണ്ടി ശ്രമിക്കുന്നവര്‍ ചെയ്യുന്നത്‌ ദഅ്‌വത്ത്‌ എന്ന മഹാസേവനമാണെന്ന കാര്യത്തില്‍ സംശയമില്ല. സഹജീവികളെ അല്ലാഹുവിന്റെ ശാപകോപതാപങ്ങളില്‍ നിന്ന്‌ കരകയറ്റി നിത്യനരകത്തില്‍ നിന്ന്‌ രക്ഷപ്പെടുത്താന്‍ ശ്രമിക്കുന്നതിനേക്കാള്‍ വലിയ മനുഷ്യസേവനമെന്താണ്‌ ! അതിവിപുലമായ പ്രബോധന സാധ്യതകളുള്ള ഇന്റര്‍നെറ്റിലൂടെ ഇസ്‌ലാമിനെ അവതരിപ്പിക്കുകയും ആദര്‍ശവിരോധികളുമായി സംവദിക്കുകയും ആശയസംഘട്ടനങ്ങള്‍ നടത്തുകയും ചെയ്യുന്നവര്‍, പക്ഷെ, ഇസ്‌ലാമികമായ മര്യാദകള്‍ പാലിക്കുവാന്‍ ബാധ്യസ്ഥരാണെന്ന കാര്യം ആ രംഗത്ത്‌ പ്രവര്‍ത്തിക്കുന്നവരൊന്നും മറന്നുകൂടാ. മറ്റുള്ളവരെ നരകത്തില്‍ നിന്ന്‌ രക്ഷിക്കുവാന്‍ ശ്രമിക്കുന്നവര്‍, തങ്ങളുടെ പരിശ്രമത്തിന്റെ ഫലമായി സ്വയം നരകത്തില്‍ ആപതിക്കുന്ന അവസ്ഥയുണ്ടാവാതിരിക്കാന്‍ ശ്രദ്ധിക്കേണ്ടതുണ്ട്‌. ആദര്‍ശ പ്രബോധനരംഗവും ആശയസംഘട്ടനത്തിന്റെ രീതിശാസ്‌ത്രവുമെല്ലാം എന്താണെന്ന്‌ കൃത്യമായി പഠിപ്പിക്കപ്പെടുകയും ആ രംഗത്ത്‌ പാലിക്കപ്പെടേണ്ട മര്യാദകള്‍ കൃത്യമായി നിഷ്‌കര്‍ഷിക്കപ്പെടുകയും ചെയ്‌തവരാണ്‌ മുസ്‌ലിംകള്‍. അല്ലാഹുവും റസൂലും പഠിപ്പിക്കാത്ത കുറുക്കുവഴികളും പ്രവാചകനില്‍ നിന്ന്‌ മതം പഠിച്ചവര്‍ക്ക്‌ പരിചയമില്ലാത്ത മാന്യമല്ലാത്ത മാര്‍ഗങ്ങളും മതപ്രബോധനത്തിന്‌ എന്ന പേരില്‍ ഉപയോഗിക്കപ്പെടുമ്പോള്‍ അവ ധാര്‍മികവും സ്വീകാര്യവുമാകുമെന്ന്‌ കരുതാന്‍ ന്യായങ്ങളൊന്നുമില്ല. അല്ലാഹുവിലേക്ക്‌ ജനങ്ങളെ ക്ഷണിക്കേണ്ടത്‌ എങ്ങിനെയെന്ന്‌ അല്ലാഹു തന്നെ മുസ്‌ലിംകളെ പഠിപ്പിച്ചിട്ടുള്ളതാണല്ലോ. “യുക്തിദീക്ഷയോടു കൂടിയും, സദൂപദേശം മുഖേനയും നിന്റെ രക്ഷിതാവിന്റെ മാര്‍ഗത്തിലേക്ക്‌ നീ ക്ഷണിച്ച്‌ കൊള്ളുക. ഏറ്റവും നല്ല രീതിയില്‍ അവരുമായി സംവാദം നടത്തുകയും ചെയ്യുക. തീര്‍ച്ചയായും നിന്റെ രക്ഷിതാവ്‌ തന്റെ മാര്‍ഗം വിട്ട്‌ പിഴച്ചുപോയവരെപ്പറ്റി നല്ലവണ്ണം അറിയുന്നവനത്രെ. സന്മാര്‍ഗം പ്രാപിച്ചവരെപ്പറ്റിയും നല്ലവണ്ണം അറിയുന്നവനത്രെ.” (ക്വുര്‍ആന്‍ 16:125).
ബൗദ്ധികമായ സത്യസന്ധതയില്ലായ്‌മ ഇന്റര്‍നെറ്റ്‌ ഉപയോക്താക്കളില്‍ കണ്ടുവരുന്ന വ്യാപകമായ ഒരു അസുഖമാണ്‌. ‘ഗൂഗിള്‍’ സര്‍ച്ച്‌ എഞ്ചിനും വിക്കിപ്പീഡിയയുമുണ്ടെങ്കില്‍ സ്വന്തം മേശപ്പുറത്തിരുന്ന്‌, കസേരയില്‍നിന്ന്‌ എഴുന്നേല്‍ക്കാതെ ഏതു ശാസ്‌ത്രവിഷയത്തിലുമുള്ള ഗവേഷണ പ്രബന്ധങ്ങള്‍ തയ്യാറാക്കാം എന്ന ഒരു ചൊല്ലുണ്ട്‌, ഇന്റര്‍നെറ്റ്‌ ഉപയോക്താക്കള്‍ക്കിടയില്‍. ഇസ്‌ലാമിക പ്രബോധന രംഗത്തുള്ളവര്‍ക്ക്‌ തീരെ ഉണ്ടാവാന്‍ പാടില്ലാത്ത സുഖക്കേടാണിത്‌. സ്വന്തം ആദര്‍ശമെന്താണെങ്കിലും അത്‌ സ്ഥാപിക്കുവാനും സമര്‍ത്ഥിക്കുവാനുമെല്ലാം ഓരോരുത്തര്‍ക്കും അവകാശമുണ്ട്‌. എന്നാല്‍ മറ്റുള്ളവരെ ഇകഴ്‌ത്തുവാനും താഴ്‌ത്തിക്കെട്ടുവാനും വേണ്ടി അവരുടെ തന്നെ സംസാരങ്ങളെയും ഉദ്ധരണികളെയും മുറിച്ചും തങ്ങളുദ്ദേശിക്കുന്ന ആശയങ്ങളുമായി വിളക്കിച്ചേര്‍ത്തും അവതരിപ്പിക്കുന്നത്‌, സത്യവിശ്വാസികള്‍ ചെയ്യാന്‍ പാടില്ലാത്ത ഗുരുതരമായ പാതകങ്ങളിലൊന്നാണ്‌. തങ്ങളുദ്ദേശിക്കുന്ന ആശയങ്ങള്‍ക്കനുസൃതമായി പണ്ഡിതന്‍മാരുടെ ഉദ്ധരണികളെയും ഫത്‌വകളെയും അവതരിപ്പിക്കുന്നതും തഥൈവ. അങ്ങനെ ചെയ്യുന്നവരില്‍ കണ്ടുവരുന്ന പ്രവണതയിതാണ്‌. ആദ്യം ഒരു ആശയം നിര്‍മിക്കുക; അത്‌ പ്രാമാണികമാണെന്ന്‌ വരുത്തിത്തീര്‍ക്കാന്‍ ശ്രമിക്കുക; സെര്‍ച്ച്‌ എഞ്ചിനില്‍ പോയി തങ്ങള്‍ നിര്‍വചിച്ച ആശയത്തിനനുസൃതമായ രേഖകള്‍ പരിശോധിക്കുക; ആരെങ്കിലും എവിടെയെങ്കിലുമെല്ലാം തങ്ങളുദ്ദേശിച്ച ആശയങ്ങള്‍ക്ക്‌ അനുകൂലമായി വല്ലതും പറഞ്ഞിട്ടുണ്ടെങ്കില്‍ അത്‌ കോപ്പി ചെയ്യുക ഇങ്ങനെ കോപ്പി ചെയ്‌തവയെല്ലാം കൂടി ഒരു ഡോക്യുമെന്റിലേക്ക്‌ പേസ്റ്റ്‌ ചെയ്‌ത്‌ തങ്ങളുദ്ദേശിക്കുന്ന ആശയങ്ങള്‍ പ്രാമാണികമാണെന്ന്‌ സമര്‍ത്ഥിക്കുന്ന പ്രബന്ധം തയ്യാറാക്കുക; ഇങ്ങനെ തയ്യാറാക്കിയ പ്രബന്ധം വ്യത്യസ്‌ത ഇ-മെയില്‍, ചാറ്റ്‌ ഗ്രൂപ്പുകളിലൂടെ പ്രചരിപ്പിക്കുക. സാഹചര്യങ്ങളുടെയോ സമ്മര്‍ദങ്ങളുടെയോ അനുഭവങ്ങളുടെയോ അടിസ്ഥാനത്തിലല്ല, പ്രമാണങ്ങളുടെ അടിസ്ഥാനത്തില്‍ ആശയരൂപീകരണം നടത്തുകയും അങ്ങനെ സുചിന്തിതമായി രൂപീകരിക്കപ്പെട്ട ആശയത്തിന്‌ അനുസൃതമായി ജീവിക്കുകയുമാണ്‌ മുസ്‌ലിം ചെയ്യേണ്ടത്‌ എന്ന ഇസ്‌ലാമിക രീതി അട്ടിമറിക്കപ്പെടുകയും ആശയരൂപീകരണം നടന്ന ശേഷം അത്‌ പ്രാമാണികമാണോയെന്ന്‌ പരിശോധിക്കുന്ന രീതിയില്‍ കാര്യങ്ങള്‍ നടക്കുന്നുവെന്നതുമാണ്‌ ഇതിലെ ഒന്നാമത്തെ തെറ്റ്‌. പ്രത്യേക സാഹചര്യങ്ങളിലും അവസരങ്ങളിലും ചോദ്യകര്‍ത്താവിന്റെ ഉദ്ദേശ്യം മനസ്സിലാക്കിയും പണ്ഡിതന്‍മാര്‍ നല്‍കുന്ന ഫത്‌വകളും പ്രകടിപ്പിക്കുന്ന അഭിപ്രായങ്ങളും പ്രസ്‌തുത സാഹചര്യമോ അവസരമോ പരിഗണിക്കാതെ ‘കോപ്പി ആന്റ്‌ പേസ്റ്റ്‌’ ചെയ്യപ്പെടുമ്പോള്‍ പലപ്പോഴും അവര്‍ വിവക്ഷിച്ചതല്ലാത്ത അര്‍ത്ഥതലങ്ങളിലേക്കായിരിക്കും അത്‌ വായനക്കാരെ നയിക്കുകയെന്നത്‌ രണ്ടാമത്തെ തെറ്റ്‌. പുതിയ ആശയനിര്‍മിതിക്കനുസരിച്ച്‌ സമൂഹത്തെ നയിക്കാന്‍ ശ്രമിക്കുമ്പോള്‍ ഉണ്ടാകുന്ന കുഴപ്പങ്ങള്‍ക്കും ഛിദ്രതകള്‍ക്കുമെല്ലാം അത്‌ കാരണമാകുമെന്നത്‌ മൂന്നാമത്തെ തെറ്റ്‌. നമ്മുടെ സാഹചര്യങ്ങളില്‍ അപ്രസക്തമോ അപ്രായോഗികമോ ആയ അഭിപ്രായങ്ങളെക്കുറിച്ച്‌ അനാവശ്യമായ ചര്‍ച്ചകളിലൂടെ വിരോധവും വിദ്വേഷവും അത്‌ വളര്‍ത്തുന്നുവെന്നത്‌ നാലാമത്തെ തെറ്റ്‌. അപ്രായോഗികമായ അഭിപ്രായങ്ങള്‍ പ്രകടിപ്പിച്ചവരായി പണ്ഡിതന്‍മാരെ അവതരിപ്പിച്ച്‌ അവരെ സമൂഹമധ്യത്തില്‍ താറടിക്കുന്നത്‌ അഞ്ചാമത്തെ തെറ്റ്‌. ഇങ്ങനെ തെറ്റുകളുടെ നിര തന്നെയാണ്‌ ഇന്റര്‍നെറ്റിന്റെ ഇത്തരത്തിലുള്ള ഉപയോഗം വഴി ഉണ്ടായിത്തീരുന്നത്‌.
വൈജ്ഞാനിക വിപുലീകരണത്തിന്‍ അനന്തമായ സാധ്യതകള്‍ തുറന്ന്‌തരുന്ന ഇന്റര്‍നെറ്റ്‌ ഇന്ന്‌ പ്രധാനമായും ഉപയോഗിക്കപ്പെടുന്നത്‌ പോര്‍ണോഗ്രാഫിക്ക്‌ വേണ്ടിയായതു പോലെ ഇസ്‌ലാമികപ്രബോധത്തിന്‌ അനന്തസാധ്യതകള്‍ നല്‍കുന്ന ഈ രംഗത്തെ, കുഴപ്പങ്ങളുണ്ടാക്കുന്നതിനും തിന്‍മകള്‍ വിതറുന്നതിനും പ്രബോധകര്‍ക്കിടയില്‍ ഛിദ്രീകരണം സൃഷ്‌ടിക്കുന്നതിനും വേണ്ടി ഉപയോഗിക്കപ്പെടുന്നുവെന്ന സങ്കടകരമായ വസ്‌തുത പണ്ഡിതന്‍മാരുടെ സത്വര ശ്രദ്ധയാവശ്യമുള്ള കാര്യങ്ങളിലൊന്നായിത്തീര്‍ന്നിരിക്കുന്നു. പ്രമാണങ്ങളെ എങ്ങനെ ഉപയോഗിക്കണമെന്നോ വ്യത്യസ്‌തങ്ങളായ സാഹചര്യങ്ങള്‍ക്കനുസരിച്ച്‌ സമൂഹത്തെ എങ്ങനെ നയിക്കണമെന്നോ വിവരമില്ലാത്ത ‘ഇന്റര്‍നെറ്റ്‌ മുഫ്‌തികളെയും മുജ്‌തഹിദുകളെയും’ അവര്‍ക്കാവശ്യമുള്ളത്‌ ആവശ്യമുള്ള ആവശ്യമുള്ള രീതിയില്‍ പറഞ്ഞുകൊടുക്കുന്ന ‘ഗൂഗ്‌ള്‍ ശൈഖി’നെയും ആദര്‍ശപ്രബോധനം ഏല്‍പിച്ചാല്‍ അത്‌ ഗൂരുതരമായ പ്രത്യാഘാതങ്ങളാണ്‌ സൃഷ്‌ടിക്കുക. പണ്ഡിതന്‍മാര്‍ ഇല്ലാതെയാകുമ്പോള്‍ മതവിധികള്‍ പറഞ്ഞു കൊടുക്കാനായി നേതാക്കന്‍മാരെ ജനം സമീപിക്കുമ്പോള്‍ വിവരമില്ലാത്ത അവര്‍ മതവിധി പറഞ്ഞുകൊടുത്തു കൊണ്ട്‌ സ്വയം പിഴക്കുകയും മറ്റുള്ളവരെ പിഴപ്പിക്കുകയും ചെയ്യുമെന്ന്‌ നബി(സ) മുന്നറിയിപ്പ്‌ (സ്വഹീഹുല്‍ ബുഖാരി, കിത്താബുല്‍ ഇല്‍മ്‌) നല്‍കിയ പിഴക്കുകയും പിഴപ്പിക്കുകയും ചെയ്യുന്നവരില്‍ ഉള്‍പ്പെടാതിരിക്കുവാന്‍ വിവരസാങ്കേതികവിദ്യയെ ഉപയോഗിക്കുന്നവരെല്ലാം ശ്രദ്ധിക്കേണ്ടതുണ്ട്‌. അല്ലാഹു അനുഗ്രഹിക്കട്ടെ (ആമീന്‍). 

Read More

കുഴപ്പങ്ങള്‍ക്ക്‌ കുട പിടിക്കരുത്‌

മുഹമ്മദ്‌ നബി(സ)യും അബൂബക്കര്‍(റ), ഉമര്‍(റ) തുടങ്ങിയ പ്രവാചകന്‍മാരും കൂടി നടത്തിയ ഒരു യാത്രയില്‍ ഒരാള്‍ അവരെ സേവിക്കാനായി കൂടെ പോയിരുന്നു. അബൂബക്കറും ഉമറും (റ) ഉറങ്ങിയെഴുന്നേറ്റപ്പോള്‍ തങ്ങള്‍ക്കായി ഭക്ഷണം തയ്യാറാക്കി വെക്കേണ്ടതിനു പകരം പ്രസ്‌തുത സേവകനും സുഖമായി ഉറങ്ങുന്നതാണ്‌ കണ്ടത്‌. അപ്പോള്‍ ഒരാള്‍ മറ്റേയാളോട്‌ പറഞ്ഞു: “ഇവന്‍ വല്ലാത്ത ഉറക്കക്കാരന്‍ തന്നെ!” അവര്‍ അദ്ദേഹത്തെ ഉണര്‍ത്തിയതിനുശേഷം പറഞ്ഞു: “അല്ലാഹുവിന്റെ ദൂതന്റെ അടുക്കല്‍ ചെന്ന്‌ അബൂബക്കറും ഉമറും താങ്കള്‍ക്ക്‌ സലാം പറഞ്ഞിട്ടുണ്ടെന്നും അവര്‍ ഭക്ഷണത്തിനായി ആവശ്യപ്പെടുന്നുവെന്നും അറിയിക്കുക.” ഇത്‌ പ്രവാചകനോട്‌(സ) പറഞ്ഞപ്പോള്‍ അദ്ദേഹം അയാളോടായി പറഞ്ഞു:”അവര്‍ക്ക്‌ എന്റെ സലാം അറിയിക്കുകയും അവര്‍ ഭക്ഷിച്ചു കഴിഞ്ഞിട്ടുണ്ടെന്നും പറയുകയും ചെയ്യുക.” പ്രവാചക പ്രതികരണം കേട്ടപ്പോള്‍ അവര്‍ രണ്ട്‌ പേരും ഉത്‌കണ്‌ഠാകുലരായി. അവര്‍ പ്രവാചകനടുത്തെത്തി ചോദിച്ചു:”അല്ലാഹുവിന്റെ ദൂതരേ, ഞങ്ങള്‍ ഭക്ഷണം ആവശ്യപ്പെട്ടുകൊണ്ട്‌ പറഞ്ഞയച്ചപ്പോള്‍ താങ്കള്‍ പറഞ്ഞത്‌ ഞങ്ങള്‍ ഭക്ഷിച്ചു കഴിഞ്ഞിട്ടുണ്ടെന്നാണല്ലോ. ഞങ്ങള്‍ എന്താണ്‌ ഭക്ഷിച്ചത്‌?” ദൈവദൂതര്‍ മറുപടി പറഞ്ഞു: “നിങ്ങളുടെ സഹോദരന്റെ മാംസമാണ്‌ നിങ്ങള്‍ ഭക്ഷിച്ചിരിക്കുന്നത്‌. എന്റെ ആത്മാവ്‌ ആരുടെ കയ്യിലാണോ അവന്‍ തന്നെയാണ സത്യം! നിങ്ങളുടെ പല്ലുകള്‍ക്കിടയില്‍ അദ്ദേഹത്തിന്റെ മാംസം ഞാന്‍ കാണുന്നുണ്ട്‌” -ആരുടെ പരദൂഷണമാണോ അവര്‍ പറഞ്ഞത്‌ അയാളുടെ മാംസം- പരദൂഷണം പറഞ്ഞവരുടെ പരദൂഷണം പറഞ്ഞവരുടെ പല്ലുകള്‍ക്കിടയില്‍ ഉണ്ടെന്നര്‍ത്ഥം. അവര്‍ ദൈവദൂതരോട്‌ അഭ്യര്‍ഥിച്ചു: “ഞങ്ങള്‍ക്കുവേണ്ടി അല്ലാഹുവിനോട്‌ പാപമോചനത്തിന്‌ തേടിയാലും!”. ദൈവദൂതര്‍ പറഞ്ഞു: “അയാളാണ്‌ നിങ്ങള്‍ക്ക്‌ വേണ്ടി പാപമോചനത്തിന്‌ അപേക്ഷിക്കേണ്ടത്‌.”(1)
ഈ സംഭവം നമുക്ക്‌ പറഞ്ഞുതരുന്ന ഗൗരവതരമായ ചില കാര്യങ്ങളുണ്ട്‌. മുസ്‌ലിം സഹോദരന്റെ ഉറക്കശീലത്തെക്കുറിച്ചുള്ള കളിയാക്കിപ്പറച്ചില്‍ പരദൂഷണമാകുമെന്നും അത്‌ മ്ലേഛമായ കുറ്റകൃത്യവും സഹോദരന്റെ പച്ചയിറച്ചി തിന്നുന്നതിന്‌ സമാനമാണെന്നുമുള്ള കാര്യമാണ്‌ ഒന്നാമത്തേത്‌. അങ്ങനെ ആരെപ്പറ്റിയെങ്കിലും പരദൂഷണം പറഞ്ഞുകഴിഞ്ഞാല്‍ സ്വയം പൊറുക്കലിനെ തേടുകയോ പ്രവാചകനടക്കമുള്ള മഹത്തുക്കളെല്ലാം ക്ഷമായാചനം നടത്തുകയോ അയാള്‍ തന്നെക്കുറിച്ച്‌ പരദൂഷണം പറഞ്ഞവര്‍ക്കുവേണ്ടി പാപമോചനത്തിനായി പ്രാര്‍ത്ഥിക്കുകയുമാണ്‌ ചെയ്യേണ്ടത്‌ എന്ന പാഠമാണ്‌ രണ്ടാമത്തേത്‌.
ഇന്റര്‍നെറ്റ്‌ പോലെയുള്ള മീഡിയകളും ഫെയ്‌സ്‌ബുക്ക്‌ പോലെയുള്ള സോഷ്യല്‍ നെറ്റ്‌വര്‍ക്കുകളും വ്യാപകമായതിന്റെ ഫലമായി പരദൂഷണപ്രചരണം ഒരു ഹോബിയായി കൊണ്ടുനടക്കുന്നവരുണ്ട്‌. തങ്ങള്‍ക്കിഷ്‌ടമില്ലാത്തവരുടെ തൊലിയുരിക്കുന്ന “ഞെട്ടിക്കുന്ന” വിവരങ്ങള്‍ പരമാവധി പേരിലെത്തിക്കുവാന്‍ ഇത്തരം മീഡിയകള്‍ വ്യാപകമായി ഉപയോഗിക്കപ്പെടുന്നു. പ്രസ്‌തുത വിവരങ്ങള്‍ പരമാവധി സത്യസന്ധമാണോയെന്നു പോലും അവ പ്രചരിപ്പിക്കുന്നവര്‍ പരിശോധിക്കുന്നില്ല. ആരോ അയച്ചുതന്നത്‌ തനിക്ക്‌ ഇഷ്‌മില്ലാത്ത വ്യക്തികളെക്കുറിച്ച്‌ തൊലിയുരിക്കുന്ന വിവരങ്ങളാണെങ്കില്‍ അത്‌ തന്റെ വാളില്‍ പോസ്റ്റ്‌ ചെയ്യുന്നതിനോ യാതൊരു വൈമനസ്യവുമില്ലാത്ത അവസ്ഥ! തങ്ങള്‍ അപവാദപ്രചരണം നടത്തിയയാള്‍ തങ്ങള്‍ ആരോപിച്ച തിന്മകളുള്‍ക്കൊള്ളുന്നയാളാണെങ്കില്‍ പോലും പ്രസ്‌തുത തിന്മകളില്‍ നിന്ന്‌ അയാള്‍ അകലുകയും താന്‍ ചെയ്‌ത തെറ്റുകളെക്കുറിച്ച്‌ അല്ലാഹുവിന്റെ മുന്നില്‍ അയാള്‍ ആത്മാര്‍ഥമായി ക്ഷമായാചനം നടത്തുകയും ചെയ്‌താല്‍ അല്ലാഹു അയാള്‍ക്ക്‌ പൊറുത്തുകൊടുക്കുമെന്നാണ്‌ ക്വുര്‍ആന്‍ നമ്മെ തെര്യപ്പെടുത്തുന്നത്‌.(39:53) പ്രസ്‌തുത തിന്മകളെ പൊതുജന മധ്യത്തിലവതരിപ്പിച്ച്‌ അയാളെ നാണം കെടുത്തിയവരുടെ കാര്യമോ? താന്‍ പ്രചരിപ്പിച്ച അപവാദങ്ങള്‍ എത്തിക്കഴിഞ്ഞ പതിനായിരങ്ങളോട്‌ താന്‍ ആരോപണങ്ങളുന്നയിച്ച ആള്‍ പശ്ചാതപിച്ചിട്ടുണ്ടെന്നും അയാള്‍ സല്‍പാന്ഥാവിലെത്തിയിട്ടുണ്ടെന്ന്‌ അറിയിക്കുവാനും അവരുടെ ധാരണകള്‍ തിരുത്തുവാനും അപവാദപ്രചാരകര്‍ക്ക്‌ കഴിയുമോ? ഇല്ലെന്നുറപ്പാണ്‌. മറ്റുള്ളവരുടെ തിന്മകള്‍ പ്രചരിപ്പിച്ചു നടക്കുന്നവര്‍ പരലോകത്തു വെച്ച്‌ പാപ്പരായിത്തീരുമെന്നും ആരുടെ തിന്മകളാണോ താന്‍ പ്രചരിപ്പിച്ചത്‌ അവരുടെ തിന്മകള്‍ താന്‍ ഏറ്റെടുക്കേണ്ടി വരുമെന്നും തന്റെ നന്മകള്‍ അയാള്‍ക്ക്‌ നല്‍കുമെന്നുമുള്ള പ്രവാചകന്റെ(സ) മുന്നറിയിപ്പ്‌(2) തിന്മകളുടെ പ്രചരണത്തിനായി ആധുനിക മീഡിയകളെ ഉപയോഗിക്കുന്നവരുടെ കണ്ണു തുറപ്പിക്കേണ്ടതാണ്‌.

മദ്യപിച്ചതിന്‌ പിടിക്കപ്പെടുകയും ശിക്ഷ നടപ്പാക്കുകയും ചെയ്‌ത സ്വഹാബിമാരിലൊരാളെ ശപിക്കുകയും തെറിപറയുകയും ചെയ്‌ത തന്റെ അനുചരന്മാരോട്‌ “നിങ്ങളുടെ സഹോദരനെതിരില്‍ നിങ്ങള്‍ പിശാചിനെ സഹായിക്കരുത്‌.”(3) എന്നും “നിങ്ങള്‍ പറയേണ്ടത്‌ അല്ലാഹുവേ, നീ അയാള്‍ക്ക്‌ പൊറുത്തുകൊടുക്കുകയും അയാളുടെ മേല്‍ കാരുണ്യം വര്‍ഷിക്കുകയും ചെ#േയ്യണമേ എന്നുമാണ്‌”(4) പ്രവാചകന്‍(സ) പറഞ്ഞത്‌. മദ്യപാനത്തെ പോലെയുള്ള ഗുരുതരമായ തിന്മ ചെയ്‌തയാളെപ്പോലും തെറി പറയുകയും ഭല്‍സിക്കുകയും ചെയ്യുകയല്ല പ്രത്യുത അയാള്‍ക്ക്‌ വേണ്ടി പൊറുക്കലിനെ തേടുകയും അല്ലാഹുവിന്റെ കാരുണ്യം അയാളില്‍ വര്‍ഷിക്കുന്നതിന്‌ വേണ്ടി പ്രാര്‍ത്ഥിക്കുകയുമാണ്‌ വേണ്ടതെന്ന്‌ പഠിപ്പിച്ച പ്രവാചകന്റെ(സ) അനുയായികള്‍ ഒരിക്കലും തന്നെ തന്റെ സഹോദരനെ കുറിച്ച്‌ അപവാദങ്ങള്‍ പ്രചരിപ്പിക്കുന്ന പതനത്തിലേക്ക്‌ ആപതിച്ചുകൂടാ. സത്യനിഷേധികളോട്‌ പോലും ഗുണകാംക്ഷയോടു പെരുമാറണമെന്ന്‌ പഠിപ്പിച്ച മതത്തിന്റെ വാക്താക്കള്‍ എങ്ങനെയാണ്‌ തന്റെ മുസ്‌ലിം സഹോദരനെ ശപിക്കുകയും പഴിക്കുകയും ചെയ്യുന്ന പതനത്തിലേത്തിച്ചേരുന്നത്‌? ഒരാളെക്കുറിച്ച്‌ തെറിപറഞ്ഞു കൊണ്ടിരിക്കുന്നയാളോട്‌ താങ്കള്‍ക്ക്‌ താങ്കള്‍ തെറിപറയുന്നയാളെ വ്യക്തിപരമായി അറിയുമോയെന്ന്‌ ചോദിച്ചപ്പോള്‍ ലഭിച്ച മറുപടി അയാളെ ഒരിക്കല്‍ പോലും താന്‍ കാണുകയോ ടെലഫോണില്‍ പോലും സംസാരിക്കുകയും ചെയ്‌തിട്ടില്ലായെന്നായിരുന്നു! തനിക്ക്‌ നേര്‍ക്കുനേരെ പരിചയമില്ലാത്തയാളെക്കുറിച്ചാണെങ്കില്‍ പോലും മറ്റുള്ളവര്‍ പറഞ്ഞു തരുന്ന തിന്മകള്‍ പ്രചരിപ്പിക്കുവാന്‍ യാതൊരു വൈമനസ്യവുമില്ലാതായിത്തീരുന്ന അവസ്ഥ എന്തുമാത്രം വലിയ പാതകമാണ്‌!
നാം ചെയ്യുന്ന നന്മകള്‍ നമുക്കു തന്നെ ഉപകാരപ്പെടണമെന്നും താന്‍ ദുഷിച്ചു പറഞ്ഞവര്‍ക്ക്‌ അവ പതിച്ചുകൊടുക്കുന്ന സ്ഥിതിയുണ്ടായിക്കൂടെന്നും ഓരോരുത്തരും തീരുമാനിച്ചാല്‍ വ്യക്തികള്‍ വിശുദ്ധരായിത്തീരുക മാത്രമല്ല, സമൂഹത്തില്‍ കുഴപ്പങ്ങളില്ലാത്ത സ്ഥിതി സംജാതമായിത്തീരുകയും ചെയ്യും. നമ്മുടെ വാക്കോ പ്രവര്‍ത്തനമോ വഴി കുഴപ്പങ്ങള്‍ തലപൊക്കിക്കൂടെന്ന്‌ ഓരോരുത്തരും തീരുമാനിച്ചാല്‍ സ്വഹാബീ സമൂഹത്തില്‍ നിലനിന്നിരുന്നത്‌ പോലെയുള്ള സാഹോദര്യം നമ്മുടെ സമൂഹത്തിലും നിലനില്‍ക്കുന്ന സ്ഥിതി സംജാതമാകും. അതിന്‌ അല്ലാഹു അനുഗ്രഹിക്കട്ടെ (ആമീന്‍).
—————————————————————————————–
1) ഇബ്‌നു കസീര്‍ (റ) സൂറത്തുല്‍ ഹുജറാത്തിന്റെ തഫ്‌സീറില്‍ ഉദ്ധരിച്ച ഈ സംഭവം സ്വഹീഹായ പരമ്പരയോട്‌കൂടിയുള്ളതാണെന്ന്‌ ശൈഖ്‌ അല്‍ബാനി സ്ഥിരീകരിച്ചിട്ടുണ്ട്‌. സില്‍സിലത്തു സ്വഹീഹ, ഹദീഥ്‌: 2608,.
2) സ്വഹീഹുല്‍ ബുഖാരി
3) സ്വഹീഹുല്‍ ബുഖാരി
4) സുനനു അബൂദാവൂദ്‌, കിത്താബുല്‍ ഹൂദൂദ്‌. ഇതിന്റെ നിവേദനം സ്വഹീഹാണെന്ന്‌ ഇമാം അല്‍ബാനി സാക്ഷ്യപ്പെടുത്തിയിട്ടുണ്ട്‌. സ്വഹീഹു അബൂദാവൂദ്‌, ഹദീഥ്‌ : 3759

Read More

വ്യതിയാനങ്ങളില്‍ പെട്ടുപോവാതിരിക്കാന്‍

താബീഈ പണ്ഡിതനായ ഹസനുല്‍ ബസ്വരി(റ)യുടെ ശിഷ്യന്‍മാരില്‍ ഒരാളായ വസ്വിലുബ്‌നു അത്വാആണ്‌ മുഅ്‌തസലി പ്രസ്ഥാനത്തിന്റെ സ്ഥാപകനായി അറിയപ്പെടുന്നത്‌. അല്ലാഹുവിന്റെ നാമഗുണ വിശേഷണങ്ങളില്‍ പലതിനേയും നിഷേധിക്കുകയും ബൂദ്ധിപരമായ അപഗ്രഥനത്തിലൂടെ ഹദീഥിന്റെ സ്വീകാര്യത നിര്‍ണയിക്കണമെന്ന്‌ വാദിക്കുകയും കര്‍മങ്ങള്‍ മലക്കുകള്‍ എഴുതി സൂക്ഷിക്കുന്നുണ്ടെന്നും ക്വബറില്‍ ചോദ്യങ്ങളുണ്ടെന്നും രക്ഷാശിക്ഷകളുണ്ടെന്നും പരലോകത്തുവെച്ച്‌ വിശ്വാസികള്‍ അല്ലാഹുവിനെ കാണുമെന്നും, അവിടെ കര്‍മങ്ങള്‍ തൂക്കിനോക്കപ്പെടുമെന്നും വിശ്വാസികള്‍ക്കായി തയാര്‍ ചെയ്യപ്പെട്ട ഹൗദുല്‍ കൗസറിലെ പാനീയമുണ്ടെന്നും നന്മ ചെയ്യുന്നവര്‍ക്ക്‌ എളുപ്പം കടന്നുപോകാനുള്ള സ്വിറാത്തുണ്ടെന്നും അന്ത്യനാളിനോടനുബന്ധിച്ച്‌ ഈസാ നബി (അ)യുടെ പുനരാഗമനമുണ്ടാകുമെന്നും ദജ്ജാലിന്റെയും യഅ്‌ജൂജ്‌-മഅ്‌ജൂജിന്റെയും പുറപ്പെടല്‍ സംഭവിക്കുമെന്നും സ്വര്‍ഗവും നരകവുമെല്ലാം സൃഷ്‌ടിക്കപ്പെട്ടിട്ടുണ്ടെന്നുമുള്ള സ്വഹീഹായ ഹദീഥുകളാല്‍ സ്ഥാപിക്കപ്പെട്ട വസ്‌തുതകള്‍ ബൗദ്ധികമായി അസ്വീകാര്യമാണെന്ന്‌ നിഷ്‌കര്‍ഷിക്കുകയും ക്വര്‍ആന്‍ സൃഷ്‌ടിയാണെന്ന്‌ പ്രചരിപ്പിക്കുകയും വന്‍പാപങ്ങള്‍ ചെയ്‌തവര്‍ ഇസ്‌ലാമില്‍നിന്ന്‌ പുറത്ത്‌ പോയവരായതിനാല്‍ ശാശ്വതമായി നരകത്തിലായിരിക്കുമെന്ന്‌ പ്രചരിപ്പിക്കുകയും ചെയ്‌ത അഹ്‌ലുസുന്നയുമായി പില്‍കാലത്ത്‌ ഏറെ അകന്നുപോയ മുഅ്‌തസിലുകളുടെ മാര്‍ഗഭ്രംശത്തിന്റെ തുടക്കം ‘അല്‍ മന്‍സ്വിലത്തു ബൈനല്‍ മന്‍സിലത്തൈന്‍’ എന്ന്‌ പില്‍കാലത്ത്‌ അറിയപ്പെട്ട വന്‍പാപങ്ങള്‍ ചെയ്‌തവര്‍ വിശ്വാസികളിലോ അവിശ്വാസികളിലോ ഉള്‍പ്പെടുന്നില്ല എന്ന വാദത്തില്‍ നിന്നായിരുന്നു.

ഇറാഖിലെ ബസ്വറയില്‍ അധ്യാപനം നിര്‍വഹിച്ചുകൊണ്ടിരുന്ന ഹസനുല്‍ ബസ്വരിയോട്‌ ‘വന്‍പാപങ്ങള്‍ ചെയ്‌തവരെ വിശ്വാസികളെന്നോ അതല്ല അവിശ്വാസികളെന്നോ എന്താണ്‌ വിളിക്കേണ്ടത്‌?’ എന്ന ഒരാളുടെ ചോദ്യത്തിന്‌ അദ്ദേഹം മറുപടി പറയുന്നതിന്‌ മുമ്പ്‌ ‘വന്‍പാപങ്ങള്‍ ചെയ്‌തവര്‍ യഥാര്‍ഥ വിശ്വാസികളോ പൂര്‍ണമായ അവിശ്വാസികളോ അല്ല; ഇത്‌ രണ്ടിനുമിടയിലുള്ള ഒരു മധ്യമനിലയിലാണ്‌ അത്തരക്കാര്‍ ഉണ്ടാവുക’യെന്ന്‌ നബി(സ) പറഞ്ഞുതന്നതിന്‌ വിരുദ്ധമായ അഭിപ്രായപ്രകടനം നടത്തുകവഴി ഗുരുവില്‍നിന്ന്‌ വേറിട്ടുപോയി അധ്യാപനം നടത്തിക്കൊണ്ടാണ്‌ വാസ്വിലുബ്‌നു അത്വാഅ്‌ തന്റെ വാദങ്ങള്‍ പ്രചരിപ്പിക്കാനാരംഭിച്ചത്‌. അതീവ ഗുരുതരമെന്ന്‌ ഒറ്റനോട്ടത്തില്‍ തോന്നാത്ത, ചെറിയൊരു വ്യതിയാനത്തില്‍നിന്ന്‌ തുടങ്ങിയ മുഅ്‌തസിലി പ്രസ്ഥാനം പില്‍ക്കാലത്ത്‌ എത്തിക്കപ്പെട്ട വഴിപിഴച്ച വാദങ്ങളുടെ ആഴത്തെക്കുറിച്ച്‌ മനസ്സിലാക്കുന്നത്‌ ക്വര്‍ആനും സുന്നത്തും വരച്ച്‌കാണിക്കുന്ന പാതയില്‍നിന്ന്‌ അല്‍പംപോലും വ്യതിചലിക്കാതെ സൂക്ഷിക്കുവാന്‍ മുസ്‌ലിംകള്‍ക്ക്‌ പ്രചോദനമാകേണ്ടതാണ്‌. വ്യതിയാന ങ്ങള്‍ പലപ്പോഴും അപകടകരമല്ലെന്ന്‌ ഒറ്റനോട്ടത്തില്‍ തോന്നിപ്പോകുന്ന, ക്വുര്‍ആനിനും സുന്നത്തിനും വിരുദ്ധമായ വാദത്തില്‍നിന്നാണ്‌ തുടങ്ങാറുള്ളതെന്ന വസ്‌തുതയാണ്‌ മുഅ്‌തസിലുകളുടെ ചരിത്രം വ്യക്തമാക്കുന്നത്‌.

പ്രവാചകന്‍(സ) മുന്നറിയിപ്പ്‌ നല്‍കിയ മുസ്‌ലിം സമൂഹത്തില്‍നിന്നുണ്ടായ ആദ്യത്തെ വ്യതിയാന കക്ഷിയായ ഖവാരിജുകളുടെ സ്ഥിതിയും വ്യത്യസ്‌തമല്ല. ക്വര്‍ആനിലെ ആയത്തുകളുദ്ധരിച്ചുകൊണ്ട്‌ ‘ഭരണാധികാരം അല്ലാഹുവിന്‌ മാത്രമാണെന്ന്‌’ സമര്‍ഥിക്കുകയും അതിന്റെ അടിസ്ഥാനത്തില്‍ തങ്ങളുടെ പിഴച്ച വാദങ്ങള്‍ പ്രചരിപ്പിക്കുകയും ചെയ്‌ത ഖവാരിജുകളെ പറ്റി ‘വാക്യം സത്യമാണ്‌; അത്‌ ഉപയോഗിക്കപ്പെടുന്നതാകട്ടെ അസത്യത്തിന്‌ വേണ്ടിയും’ എന്നാണ്‌ അലി(റ) പറഞ്ഞത്‌. ഇമാം മുസ്‌ലിം തന്റെ സ്വഹീഹിലെ അഞ്ചാം അധ്യായമായ കിത്താബുസ്സകാത്തിലെ രണ്ട്‌ ബാബുകളിലായി (44,45) ഖവാരിജുകളെക്കുറിച്ച്‌ ഇരുപത്തിമൂന്ന്‌ ഹദീഥുകള്‍ നിവേദനം ചെയ്യുന്നുണ്ട്‌. ഇസ്‌ലാമിക സമൂഹത്തിന്റെ നേതാവായിരുന്ന പ്രവാചകന്റെ(സ) നീതിബോധത്തെ ചോദ്യം ചെയ്‌തയാളില്‍നിന്നാണ്‌ ഖവാരിജുകളുടെ തുടക്കം എന്നാണ്‌ ഈ ഹദീഥുകള്‍ നല്‍കുന്ന ഒന്നാമത്തെ വിവരം. അവര്‍ ക്വുര്‍ആന്‍ പാരായണം ചെയ്യുമെങ്കിലും അതവരുടെ തൊണ്ടക്കുഴിക്ക്‌ പുറത്തേക്ക്‌ കടക്കുകയില്ല, അവരുടെ നമസ്‌കാരവും നോമ്പുമെല്ലാം മറ്റു മുസ്‌ലിംകളുമായി താരതമ്യം ചെയ്‌താല്‍ അതീവ ഭക്തിപാരവശ്യത്തോട്‌ കൂടിയുള്ളതാണെന്ന്‌ തോന്നും. അവരുടെ നമസ്‌കാരം സ്വന്തം തോളെല്ലിനപ്പുറത്തേക്ക്‌ പോവുകയില്ല. തങ്ങളുടെ വാദങ്ങള്‍ സമര്‍ത്ഥിക്കാനായി അവര്‍ ക്വര്‍ആന്‍ വചനങ്ങള്‍ ഓതുമെങ്കിലും അവ യഥാര്‍ഥത്തില്‍ അവര്‍ക്കെതിരായിരിക്കും. ഇരയില്‍നിന്ന്‌ തെറിച്ചുപോവുന്ന അമ്പില്‍ അതിന്റെ രക്തമോ മാംസമോ പറ്റിപ്പിടിക്കാത്തതുപോലെ ഇസ്‌ലാമിന്റെ യാതൊന്നും തങ്ങളില്‍ അവശേഷിപ്പിക്കാത്തവിധം അവര്‍ ഇസ്‌ലാമില്‍നിന്ന്‌ തെറിച്ചുപോകും, എന്നിവയായിരിക്കും ഖവാരിജുകളുടെ അടയാളങ്ങളെന്നാണ്‌ നബി(സ) മുന്നറിയിപ്പ്‌ നല്‍കിയത്‌.

പുറമെ കാണുന്ന മതപരമായ ഹാവ-ഭാവാദികളില്‍ ആകൃഷ്‌ടരായിക്കൊണ്ട്‌, അവര്‍ ഉദ്ധരിക്കുന്ന പ്രമാണങ്ങളിലെന്താണുള്ളതെന്ന്‌ കൃത്യമായി മനസ്സിലാക്കാതെ വ്യതിയാനക്കാര്‍ക്ക്‌ പിന്നില്‍ അണിനിരക്കുന്ന ദുരവസ്ഥയുണ്ടായാല്‍ ഇസ്‌ലാമിന്റെ അംശങ്ങളൊന്നും അവശേഷിക്കാത്തവിധം സമൂഹത്തില്‍നിന്ന്‌ തെറിച്ചുപോകുന്ന സ്ഥിതിയാണുണ്ടാവുകയെന്ന്‌ വിശ്വാസികളെ പഠിപ്പിക്കുകയാണ്‌ പ്രവാചകന്‍(സ) ചെയ്‌തതെന്ന വസ്‌തുത വ്യക്തമാക്കുന്നതാണ്‌ നടേ പറഞ്ഞ ഹദീഥുകള്‍.

അലി(റ)ക്കെതിരെ യുദ്ധം ചെയ്യാനായി ഒരുങ്ങിവന്ന ആറായിരത്തോളം വരുന്ന ഖവാരിജുകളോട്‌ താന്‍ നടത്തിയതായി പ്രവാചകാനുചരന്‍മാരില്‍ പ്രമുഖനായ അബ്‌ദുല്ലാഹിബ്‌നു അബ്ബാസ്‌(റ) വെളിപ്പെടുത്തിയ സംവാദത്തെക്കുറിച്ച വിശദമായ വിവരണമടങ്ങിയ ദീര്‍ഘമായ ഹദീഥില്‍നിന്ന്‌ (ഇമാം അബ്‌ദുല്‍റസാഖ്‌ തന്റെ മുസന്നഫിലും (18678), ഇമാം അഹ്‌മദ്‌ തന്റെ മുസ്‌നദിലും (1/243 നിവേദനം ചെയ്‌തത്‌) വ്യതിയാന കക്ഷികളുടെ സ്വഭാവങ്ങളെക്കുറിച്ച്‌ വ്യക്തമായ വിവരങ്ങള്‍ ലഭിക്കുന്നുണ്ട്‌.

ഖവാരിജുകളുടെ കൂടാരത്തിനകത്തേക്ക്‌ കയറിയ ഉടനെത്തന്നെ സഹാബിമാര്‍ക്കിടയിലെ പ്രമുഖനും പ്രവാചകന്റെ പിതൃവ്യപുത്രനുമായ ഇബ്‌നു അബ്ബാസിനെ (റ) അദ്ദേഹത്തിന്റെ സ്ഥാനമോ ആദരണീയതയോ പരിഗണിക്കാതെ, താന്‍ ധരിച്ച വൃത്തിയും വെടിപ്പുമുള്ള യമനി വസ്‌ത്രത്തെ കളിയാക്കിക്കൊണ്ട്‌ സംസാരിച്ച അവരുടെ നടപടിയില്‍നിന്ന്‌ പരിഹാസം ഇത്തരക്കാരുടെ സ്ഥിരം സ്വഭാവമാണെന്ന്‌ വ്യക്തമാകുന്നുണ്ട്‌. സ്വഹാബിമാരെ തെറി പറയുന്നതില്‍ അഭിരമിക്കുന്ന ശിയാക്കളും താബിഉകളും തബഉത്താബിഉകളുമായ പണ്ഡിതന്മാരെ പരിഹസിക്കുന്നതില്‍ വിദഗ്‌ധരായ മുഅ്‌തസിലുകളുമെല്ലാം ഇവരുടെ പരിഹാസ പാരമ്പര്യം നിലനിര്‍ത്തിയവരാണ്‌. താന്‍ അവരുടെ കൂടാരത്തില്‍ കയറിയപ്പോള്‍ കണ്ടത്‌ തലേന്ന്‌ രാത്രിയില്‍ ഉറക്കമൊഴിച്ച്‌ നമസ്‌കരിച്ചതിനാല്‍ മുഖത്ത്‌ ഉറക്കക്ഷീണം പ്രകടമാവുകയും ദീര്‍ഘനേര നമസ്‌കാരത്താല്‍ നെറ്റിയിലും കാലുകളിലും തഴമ്പ്‌ വരികയും വസ്‌ത്രത്തില്‍ പുരണ്ട അഴുക്കുപോലും ശ്രദ്ധിക്കാന്‍ മെനക്കെടാത്തവിധം വിരക്തരാവുകയും ചെയ്‌തവരാണെന്ന ഇബ്‌നു അബ്ബാസി(റ)ന്റെ സാക്ഷ്യം ‘അവരുടെ നമസ്‌കാരവും നോമ്പുമെല്ലാം നിങ്ങളെ ആശ്ചര്യഭരിതരാക്കും’ എന്ന പ്രവാചക പ്രവചനത്തിന്റെ പൂര്‍ത്തീകരണം വെളിപ്പെടുത്തുന്നതോടൊപ്പം പുറത്തേക്ക്‌ കാണുന്ന ഭക്തിപാരവശ്യമല്ല ഒരാളുടെ ശരിയും തെറ്റും തീരുമാനിക്കുന്നതിന്‌ ഉപയോഗിക്കേണ്ട മാനദണ്ഡമെന്ന വിവരവും നല്‍കുന്നുണ്ട്‌.

അലി(റ)ക്കെതിരെ ഖവാരിജുകള്‍ ഉന്നയിച്ച വാദങ്ങള്‍ക്ക്‌ താന്‍ മറുപടി പറയവെ ക്വര്‍ആന്‍ സൂക്തങ്ങള്‍ ഉദ്ധരിച്ചപ്പോള്‍ പ്രസ്‌തുത സൂക്തങ്ങള്‍ ആദ്യമായി കേള്‍ക്കുന്നതുപോലെയാണ്‌ അവര്‍ പ്രതികരിച്ചതെന്ന ഇബ്‌നു അബ്ബാസിന്റെ വെളിപ്പെടുത്തല്‍ ‘അവര്‍ സുന്ദരമായി ക്വര്‍ആന്‍ പാരായണം ചെയ്യുമെങ്കിലും അത്‌ തൊണ്ടക്കുഴിയില്‍നിന്ന്‌ അകത്തേക്ക്‌ കടക്കുകയില്ലാ’യെന്ന പ്രവാചക വചനത്തിന്റെ പൂര്‍ത്തീകരണം വ്യക്തമാക്കുന്നതോടൊപ്പം തങ്ങളുടെ ആശയങ്ങള്‍ സ്ഥാപിക്കുന്നതിനുവേണ്ടി പ്രമാണങ്ങള്‍ ഉദ്ധരിക്കുകയും എന്നാല്‍ തങ്ങളുടെ ജീവിതത്തെ സ്വാധീനിക്കേണ്ടവിധത്തില്‍ അവ ഉള്‍ക്കൊള്ളാന്‍ സന്നദ്ധമാവാതിരിക്കുകയും ചെയ്യുന്നവരായിരിക്കും വ്യതിയാനക്കാരോടൊപ്പം കൂട്ടുചേരുന്നതെന്ന യാഥാര്‍ഥ്യവും മനസ്സിലാക്കിത്തരുന്നുണ്ട്‌. ക്വുര്‍ആനിന്റെയും പ്രവാചകചര്യയുടെയും വെളിച്ചത്തില്‍ അവരുടെ ആരോപണങ്ങള്‍ക്ക്‌ മറുപടി പറഞ്ഞപ്പോള്‍ അലി(റ)ക്കെതിരെ യുദ്ധം ചെയ്യാനെത്തിയവരില്‍നിന്ന്‌ മുന്നിലൊന്ന്‌ തിരിച്ചുപോയതായുള്ള ഇബ്‌നു അബ്ബാസിന്റെ വിവരണത്തില്‍നിന്ന്‌ വ്യതിയാനക്കാരോടൊപ്പം ചേരുന്നത്‌ പലപ്പോഴും വിവരമില്ലാത്ത നിഷ്‌കളങ്കരായിരിക്കുമെന്നും അവര്‍ക്ക്‌ പ്രമാണങ്ങളുടെ വെളിച്ചത്തില്‍ കാര്യങ്ങള്‍ ബോധ്യപ്പെട്ടാല്‍ സത്യമാര്‍ഗത്തിലേക്ക്‌ തിരിച്ചുവരുമെന്നുള്ള വസ്‌തുതകള്‍ വ്യക്തമാകുന്നുണ്ട്‌.

ക്വുര്‍ആനും സുന്നത്തും സ്ഥാപിച്ച ബലിഷ്‌ഠമായ ആദര്‍ശത്തില്‍നിന്ന്‌ അറിവില്ലാത്തതിനാല്‍ വഴിതെറ്റിപ്പോകുന്നവരെ പ്രമാണങ്ങളുടെ പാതയിലേക്ക്‌ നയിക്കേണ്ടത്‌ വിവരമുള്ളവരുടെ ബാധ്യതയാണെന്നര്‍ത്ഥം. ഒരു നേര്‍രേഖയും അതിന്‌ ഇടതും വലതുമായി നിരവധി രേഖകളും വരച്ച്‌, നേര്‍രേഖയെ ചൂണ്ടി ഇതാണ്‌ പാതയെന്നും ഇതില്‍നിന്ന്‌ പിഴച്ചുപോകുന്നവരുടെ പൈശാചികപാതകളാണ്‌ മറ്റുള്ളവയെന്നും അവയിലേക്കെല്ലാം ക്ഷണിക്കുവാനായി പിശാചുക്കളുണ്ടായിരിക്കുമെന്നുമുള്ള പ്രവാചകനില്‍(സ) നിന്ന്‌ ഇബ്‌നു മസ്‌ഊദ്‌(റ) നിവേദനം ചെയ്‌ത, ഇമാം അഹ്‌മദും ഇമാം ഹാക്കിമും ഉദ്ധരിച്ച സ്വഹീഹായ ഹദീഥ്‌ വ്യതിയാനങ്ങളുടെ ആവിര്‍ഭാവത്തെക്കുറിച്ച അമൂല്യമായ അറിവാണ്‌ നല്‍കുന്നത്‌; നേര്‍മാര്‍ഗത്തില്‍നിന്ന്‌ വ്യതിചലിപ്പിക്കാനായി പിശാചുക്കള്‍ സദാ ശ്രമിച്ചുകൊണ്ടിരിക്കയാണെന്നും ചെറിയ വ്യതിയാനങ്ങളിലൂടെയായിരിക്കും ഭീകരമായ മാര്‍ഗഭ്രംശത്തിലേക്ക്‌ പിശാചുക്കള്‍ കൊണ്ട്‌പോവുകയെന്നുമുള്ള അറിവ്‌ സത്യമാര്‍ഗത്തിലൂടെ ചരിച്ച്‌ സ്വര്‍ഗപ്രവേശം നേടണമെന്നാഗ്രഹിക്കുന്നവരെ സംബന്ധിച്ചിടത്തോളം അമൂല്യംതന്നെയാണ്‌. പ്രമാണങ്ങളുടെ പ്രോജ്ജ്വല പ്രകാശത്തിലൂടെ നടന്നുപോകുന്നതിനിടയില്‍ എപ്പോഴെങ്കിലും വഴിതെറ്റിപ്പോകുവാനുള്ള ക്ഷണമോ പ്രചോദനമോ ഉണ്ടാകുമ്പോള്‍ താന്‍ തെരഞ്ഞെടുക്കുന്നത്‌ ക്വുര്‍ആനിന്റെയും സുന്നത്തിന്റെയും അടിത്തറയില്‍ സ്ഥാപിക്കപ്പെട്ട പാത തന്നെയാണോയെന്നും അതല്ല പിശാചുക്കള്‍ ക്ഷണിച്ചുകൊണ്ടിരിക്കുന്ന വ്യതിയാനത്തിന്റെ മാര്‍ഗമാണോയെന്നും നിഷ്‌കൃഷ്‌ടമായി പരിശോധിക്കുവാന്‍ വിശ്വാസിയെ പ്രേരിപ്പിക്കുന്നത്‌ ഈ അമൂല്യമായ അറിവാണ്‌. പ്രസ്‌തുത അറിവ്‌ നല്‍കുന്ന വെളിച്ചം പ്രബോധകരുടെയെല്ലാം ജീവിതത്തെ പ്രകാശമാനമാക്കേണ്ടതുണ്ട്‌, അവരെ വഴിനടത്തേണ്ടതുണ്ട്‌. അല്ലാഹു അനുഗ്രഹിക്കട്ടെ. (ആമീന്‍).  

Read More

നമുക്ക് സ്‌നേഹിക്കുക; അല്ലാഹുവിന്നായി

‘സത്യവിശ്വാസികള്‍ പരസ്പരം സഹോദരങ്ങള്‍ തന്നെയാകുന്നു’. (49:10) യെന്നാണ് ക്വുര്‍ആന്‍ അസന്നിഗ്ധമായി പ്രഖ്യാപിക്കുന്നത്. വിശ്വാസികള്‍ തമ്മില്‍ നിലനില്‍ക്കേണ്ട സാഹോദര്യബന്ധത്തെക്കുറിച്ച് മുഹമ്മദ് നബി(സ) വിശദീകരിച്ചത് ഇങ്ങനെയാണ്: ‘സത്യവിശ്വാസികള്‍ തമ്മിലുള്ള പരസ്പരസ്‌നേഹത്തിന്റെയും കാരുണ്യത്തിന്റെയും അനുകമ്പയുടെയും ഉദാഹരണം ഒരൊറ്റ ശരീരം പോലെയാണ്. അതില്‍ ഒരു അവയവത്തിന് രോഗം ബാധിച്ചാല്‍ ബാക്കി ശരീരവും ഉറക്കമൊഴിച്ചും പനിച്ചും ദു:ഖത്തില്‍ പങ്കുകൊള്ളും.(1) ‘ഒരു വിശ്വാസി മറ്റൊരു വിശ്വാസിക്ക് കെട്ടിടം പോലെയാണ്. അത് പരസ്പരം ബലപ്പെടുത്തുന്നു’(2) വെന്നാണ് മറ്റൊരിക്കല്‍ നബി(സ) വിശ്വാസികള്‍ തമ്മിലുണ്ടാകേണ്ട ബന്ധത്തെക്കുറിച്ച് പറഞ്ഞത്. പരസ്പരം സഹോദരങ്ങളാവണമെന്ന് വിശ്വാസികളെ ശക്തമായി ഉപദേശിച്ചുകൊണ്ട് പ്രവാചകന്‍ (സ) പറഞ്ഞു: ‘അല്ലാഹുവിന്റെ ദാസന്‍മാരേ, നിങ്ങള്‍ സഹോദരങ്ങളാവുക. ഒരു മുസ്‌ലിം മറ്റൊരു മുസ്‌ലിമിന്റെ സഹോദരനാണ്. അവനോട് അക്രമം കാണിക്കുകയില്ല; അവനെ കൈവെടിയുകയില്ല; അവനെ നിസ്സാരനായി കാണുകയില്ല; എന്നിട്ട് മൂന്നു തവണ നെഞ്ചിലേക്ക് ചൂണ്ടിക്കൊണ്ട് പ്രവാചകന്‍(സ) പറഞ്ഞു: ഇവിടെയാണ് തഖ്‌വ. തന്റെ സഹോദരനായ മുസ്‌ലിമിനെ നിന്ദിക്കുന്നതുതന്നെ തിന്മയായി ഒരാള്‍ക്ക് മതി. തന്റെ സഹോദരന്റെ രക്തവും സമ്പത്തും അഭിമാനവുമെല്ലാം ഓരോ മുസ്‌ലിമിനും നിഷിദ്ധമാണ്. (3)

വിശ്വാസികള്‍ തമ്മില്‍ നിലനില്‍ക്കേണ്ട സ്‌നേഹബന്ധത്തെക്കുറിച്ച് പരാമര്‍ശിക്കുന്ന പ്രവാചകവചനങ്ങള്‍ ഏതൊരു മുസ്‌ലിമിന്റെയും മനസ്സിനെ കോള്‍മയിര്‍ കൊള്ളിക്കുന്നതും അതിരില്ലാതെ പരസ്പരം സ്‌നേഹിക്കുവാന്‍ പ്രചോദിപ്പിക്കുന്നതുമാണ്. മറ്റൊരു തണലും ലഭിക്കാത്ത വിചാരണനാളില്‍ അല്ലാഹുവിന്റെ തണലു ലഭിക്കുന്ന ഏഴു വിഭാഗത്തില്‍ ഒരു വിഭാഗമായി പ്രവാചകന്‍(സ) എണ്ണിയത് ‘അല്ലാഹുവിനെ മുന്‍നിര്‍ത്തി പരസ്പരം അടുക്കുകയും സ്‌നേഹിക്കുകയും മരണംവരെ അത് നിലനിര്‍ത്തുകയും ചെയ്ത രണ്ടുപേര്‍’ (4) എന്നാണെന്ന വസ്തുത വിശ്വാസത്തിന്റെ ലാഞ്ചനയെങ്കിലും മനസ്സിലുള്ള ആരെയും മറ്റ് വിശ്വാസികളെ ഉള്ളുതുറന്ന് സ്‌നേഹിക്കുവാന്‍ പ്രചോദിപ്പിക്കുന്നതാണ്. അന്ത്യനാളില്‍ പ്രതാപിയും മഹാനുമായ അല്ലാഹു ഇങ്ങനെ ചോദിക്കുമത്രെ: ‘എന്റെ മഹത്വതെ മുന്‍നിര്‍ത്തി പരസ്പരം സ്‌നേഹിക്കുന്നവരെവിടെ? എന്റെ തണലല്ലാതെ മറ്റൊരു തണലുമില്ലാത്ത ഇന്ന് ഞാന്‍ അവര്‍ക്ക് തണലേകും.’(5). ഉമര്‍ (റ) നിവേദനം ചെയ്ത ഒരു നബിവചനം ഇങ്ങനെയാണ്: ‘പുനരുത്ഥാനനാളില്‍ അല്ലാഹുവിന്റെ ദാസന്‍മാരായ പ്രവാചകന്‍മാരോ രക്തസാക്ഷികളോ അല്ലാത്ത ചിലര്‍ക്ക് അല്ലാഹു നല്‍കുന്ന സ്ഥാനമാനങ്ങള്‍ കാണുമ്പോള്‍ പ്രവാചകന്‍മാര്‍ക്കും രക്തസാക്ഷികള്‍ക്കും അവരോട് അസൂയ തോന്നും. കുടുംബ ബന്ധമോ സാമ്പത്തിക കൊള്ളക്കൊടുക്കലുകളോ മൂലമല്ലാതെ അല്ലാഹുവിന് മാത്രമായി പരസ്പരം സ്‌നേഹിച്ചവരാണ് അവര്‍. അവരുടെ മുഖങ്ങള്‍ പ്രകാശമാനമായിരിക്കും. മഒരുടെ പീഠങ്ങള്‍ പ്രകാശിക്കുന്നതായിരിക്കും. ജനങ്ങള്‍ ഭയപ്പാടിലാകുന്ന സന്ദര്‍ഭത്തില്‍ അവര്‍ക്ക് ഭയമൊന്നുമുണ്ടാവുകയില്ല. ജനങ്ങള്‍ ഭീതിയിലായിരിക്കുമ്പോഴും അവര്‍ സമാധനാചിത്തരായിരിക്കും’ ഇത് പറഞ്ഞുകൊണ്ട് പ്രവാചകന്‍ (സ) ‘ശ്രദ്ധിക്കുക, തീര്‍ച്ചയായും അല്ലാഹുവിന്റെ മിത്രങ്ങളാരോ അവര്‍ക്ക് യാതൊരു ഭയവുമില്ല; അവര്‍ ദു:ഖിക്കേണ്ടിവരികയുമില്ല.’ (10/62) എന്ന ക്വുര്‍ആന്‍ സൂക്തം പാരായണം ചെയ്തു’(6).

വിശ്വാസികള്‍ തമ്മിലുള്ള സ്‌നേഹം നിലനിര്‍ത്തേണ്ടത് എങ്ങനെയാണെന്ന് പ്രവാചകന്‍(സ) പഠിപ്പിച്ചിട്ടുണ്ട്. ‘നിങ്ങള്‍ പരസ്പരം അസൂയ കാണിക്കരുത്, ചരക്കിനെ പ്രശംസിച്ച് വിലകൂട്ടി പറയരുത്, പരസ്പരം കോപിക്കരുത്, പരസ്പരം പിണങ്ങി മാറി നില്‍ക്കരുത്, ഒരാളുടെ കച്ചവടത്തിനുമേല്‍ കച്ചവടം നടത്തരുത്’(7) എന്നിങ്ങനെ വിശ്വാസികളോടായുള്ള പ്രവാചകനിര്‍ദേശങ്ങള്‍ സ്‌നേഹബന്ധത്തെ തകര്‍ക്കാതിരിക്കുന്നതിനായുള്ള നിഷേധ പാഠങ്ങളാണ്. ഈ പാഠങ്ങള്‍ അനുസരിക്കുവാന്‍ പ്രവാചകാനുയായികളെല്ലാം സന്നദ്ധമാവുകയാണെങ്കില്‍ അവര്‍ തമ്മില്‍ നിലനില്‍ക്കുന്ന സ്‌നേഹബന്ധം തകരാതെ സൂക്ഷിക്കുവാന്‍ കഴിയും. മുസ്‌ലിംകള്‍ തമ്മില്‍ പാലിക്കേണ്ട ബാധ്യതകളായി പ്രവാചകന്‍(സ) പഠിപ്പിച്ച ‘കണ്ടുമുട്ടിയാല്‍ സലാം പറയുക, തുമ്മുകയും അയാള്‍ അല്ലാഹുവിനെ സ്തുതിക്കുകയും ചെയ്താല്‍ അവന് കാരുണ്യത്തിനായി പ്രാര്‍ത്ഥിക്കുക, രോഗിയായാല്‍ സന്ദര്‍ശിക്കുക, മരണപ്പെട്ടാല്‍ ജനാസ പിന്തുടരുക’(8) എന്നീ ആറു കാര്യങ്ങളിലുള്ള നിഷ്‌കര്‍ഷമൂലം മനസ്സുകളില്‍ സ്‌നേഹം നിറയുകയും സംതൃപ്തമായ സഹവര്‍ത്തിത്വത്തിന് നിമിത്തമാവുകയും ചെയ്യും.

വിശ്വാസികള്‍ തമ്മില്‍ നിലനില്‍ക്കേണ്ട സാഹോദര്യത്തെക്കുറിച്ച് പഠിപ്പിക്കുകയും സഹോദരങ്ങള്‍ തമ്മില്‍ രജ്ഞിപ്പുണ്ടാക്കണമെന്ന് കല്‍പിക്കുകയും ചെയ്യുന്ന ക്വുര്‍ആന്‍ പ്രസ്തുത സാഹോദര്യത്തെ തകര്‍ക്കുന്ന ആറു കാര്യങ്ങളില്‍നിന്ന് വിട്ടുനില്‍ക്കണമെന്നുകൂടി നിഷ്‌കര്‍ഷിക്കുന്നുണ്ട്. പരസ്പരം പരിഹസിക്കാതിരിക്കുക, അപമാനിക്കാതിരിക്കുക, കുത്തുവാക്കുകള്‍ പറയാതിരിക്കുക, ഊഹിച്ച് പറയാതിരിക്കുക, ചാരവൃത്തി നടത്താതിരിക്കുക, പരദൂഷണം പറയാതിരിക്കുക എന്നിവയാണ് സാഹോദര്യം തകരാതിരിക്കുന്നതിനുള്ള ക്വുര്‍ആനിന്റെ ഷഡ് നിര്‍ദേശങ്ങള്‍. (ക്വുര്‍ആന്‍ 49:10-12). ഈ നിര്‍ദേശങ്ങള്‍ പാലിക്കുന്നതില്‍ വീഴ്ച വരുത്താതിരിക്കാന്‍ നാം ശ്രദ്ധിക്കുകയാണെങ്കില്‍ സാഹോദര്യവും സ്‌നേഹവും നിലനില്‍ക്കുമെന്നുറപ്പാണ്. വിശ്വാസിയെ പരിഹസിക്കുകയും അയാളുടെ അഭിമാനത്തിന് ക്ഷതം വരുത്തുകയും അയാളുടെ സ്വകാര്യതയെ ചുഴിഞ്ഞന്വേഷിച്ച് അത് ജനങ്ങള്‍ക്കിടയില്‍ പരസ്യപ്പെടുത്തുകയും ചെയ്യുന്നവര്‍ ഭൂമിയില്‍വെച്ച് വെറുപ്പിന്റെ പ്രചാരകരും പ്രസാരകുരമായി നിലനില്‍ക്കുന്നവരും പരലോകത്തുവെച്ച് അല്ലാഹുവിന്റെ വെറുപ്പിന് പാത്രമായിത്തീരുന്നവരുമായിരിക്കുമെന്ന വസ്തുതയിലേക്കാണ് ക്വുര്‍ആന്‍ ഇവിടെ വിരല്‍ചൂണ്ടുന്നതെന്ന് മനസ്സിലാക്കുവാനും പ്രസ്തുത തിന്മകളില്‍നിന്ന് മാറി നില്‍ക്കുവാനും വിശ്വാസികള്‍ക്ക് കഴിയേണ്ടതുണ്ട്.

പരസ്പരസ്‌നേഹം വിശ്വാസികളില്‍ നിര്‍ബന്ധമായും ഉണ്ടാകേണ്ടതാണെന്ന് പഠിപ്പിച്ച പ്രവാചകന്‍(സ) അത് നിലനിര്‍ത്തുന്നതുമായി ബന്ധപ്പെട്ട ശ്രദ്ധേയമായ ചില നിര്‍ദേശങ്ങള്‍ മുന്നോട്ടു വെക്കുന്നുണ്ട്. അവയില്‍ പ്രധാനപ്പെട്ടവ ഇവയാണ്:

1. സ്വന്തത്തിന് ഇഷ്ടപ്പെടുന്നത് സഹോദരനുവേണ്ടിയും ഇഷ്ടപ്പെടുക. ‘അനസി(റ)ല്‍നിന്ന്: നബി(സ) അരുളി: തനിക്കുണ്ടാകണമെന്ന് ഇഷ്ടപ്പെടുന്നത് തന്റെ സഹോദരനുവേണ്ടി ഇഷ്ടപ്പെടുന്നതുവരെ നിങ്ങളിലാരും വിശ്വാസിയാവുകയില്ല.’(9)

2. പരസ്പരം നാവുകൊണ്ട് അക്രമിക്കാതിരിക്കുക. ‘ അബ്ദുല്ലാഹിബ്‌നു അംറില്‍(റ) നിന്ന്: നബി(സ) അരുളി: ആരുടെ കൈയില്‍നിന്നും നാവില്‍നിന്നും മുസ്‌ലിംകള്‍ സുരക്ഷിതരാണോ അവനാണ് (സമ്പൂര്‍ണനായ) മുസ്‌ലിം. അല്ലാഹു വിലക്കിയത് വര്‍ജിക്കുന്നവനാണ് മുഹാജിര്‍.’(10)

3. പരസ്പരം ന്യൂനതകള്‍ മറച്ചുവെക്കുക. ‘അബൂഹുറയ്‌റ(റ)യില്‍നിന്ന്: നബി(സ) പറഞ്ഞു: അടിമ മറ്റൊരാളുടെ ന്യൂനതകള്‍ ഇഹലോകത്ത് മറച്ച് വെക്കുന്നുവെങ്കില്‍ പരലോകത്ത് അല്ലാഹു അവന്റെ ന്യൂനതകള്‍ മറച്ച് വെക്കും.’(11).

4. അസൂയ,വെറുപ്പ്, പിണക്കം എന്നിവ ഉണ്ടാകാതെ സൂക്ഷിക്കുക. ‘അനസി(റ)ല്‍നിന്ന്: നബി(സ) പറഞ്ഞു: നിങ്ങള്‍ പരസ്പരം ദേഷ്യപ്പെടുകയോ അസൂയ കാണിക്കുകയോ അന്യോന്യം പുറംതിരിഞ്ഞ് (പിണങ്ങി) നില്‍ക്കുകയോ ചെയ്യരുത്. അല്ലാഹുവിന്റെ അടിയാറുകളേ, നിങ്ങള്‍ സഹോദരങ്ങളാവുക. മൂന്ന് ദിവസത്തിലധികം തന്റെ സഹോദരനുമായി (മുസ്‌ലിമുമായി) പിണങ്ങിനില്‍ക്കല്‍ മുസ്‌ലിമിന് അനുവദനീയമല്ല.’ (12)

5. ചുഴിഞ്ഞന്വേഷിച്ച് തെറ്റുകുറ്റങ്ങള്‍ പ്രചരിപ്പിക്കരുത്. ‘അബൂഹുറയ്‌റ(റ)യില്‍ നിന്ന്: നബി(സ) പറഞ്ഞു: ഊഹത്തെ നിങ്ങള്‍ കരുതിയിരിക്കുക. ഊഹം സംസാരത്തിലെ ഏറ്റവും വലിയ കള്ളമാണ്. നിങ്ങള്‍ മറഞ്ഞ കാര്യങ്ങളും സ്ഥിതിഗതികളും തേടി നടക്കരുത്. ജനങ്ങളുടെ കുറ്റങ്ങളും കുറവുകളും ചുഴിഞ്ഞന്വേഷിക്കരുത്. പരസ്പരം മത്സരിക്കരുത്. അസൂയ കാണിക്കരുത്. ദേഷ്യപ്പെടരുത്. പരസ്പരം പുറംതിരിഞ്ഞ് (പിണങ്ങി) നില്‍ക്കരുത്. അല്ലാഹുവിന്റെ ദാസന്മാരെ, നിങ്ങള്‍ സഹോദരങ്ങളായി വര്‍ത്തിക്കുക.’(13)

6. പരസ്പരം പരദൂഷണം പറയരുത്. ‘അബൂഹുറയ്‌റ(റ)യില്‍ നിന്ന്: നബി(സ) പറഞ്ഞു: ‘ഗീബത്ത് എന്താണെന്ന് നിങ്ങള്‍ക്കറിയാമോ?’ സ്വഹാബികള്‍ പറഞ്ഞു: അല്ലാഹുവിനും അവന്റെ റസൂലിനുമാണ് ഏറെ അറിവുള്ളത്. അവിടുന്ന് പറഞ്ഞു: നിന്റെ സഹോദരനെ കുറിച്ച് അവര്‍ വെറുക്കുന്നത് പറയലാണ്. ഒരാള്‍ ചോദിച്ചു ‘ഞാന്‍ പറയുന്നത് സഹോദരനില്‍ ഉള്ളതാണെങ്കിലോ? അവിടുന്ന് പറഞ്ഞു: നീ പറയുന്ന കാര്യം സഹോദരനില്‍ ഉള്ളതാണെങ്കില്‍ അതാണ് ഗീബത്ത് (പരദൂഷണം), അവനില്‍ ഇല്ലാത്തതാണെങ്കില്‍ അവനെ കുറിച്ച് നീ കളവ് പറഞ്ഞു.’ (14)

7. പരസ്പരം നന്മക്കുവേണ്ടി പ്രാര്‍ത്ഥിക്കുക. ‘സ്വഫ്‌വാനില്‍ (റ) നിന്ന്: അദ്ദേഹം അബ്ദുല്ലാഹിബ്‌നു സ്വഫ്‌വാന്റെ പുത്രനാണ്-അദ്ദേഹത്തിന്റെ ഭാര്യയാണ് ദര്‍ദാഅ്. അദ്ദേഹം പറഞ്ഞു: ഞാന്‍ ശാമില്‍ ചെന്നു. അബൂദ്ദര്‍ദാഇന്റെ വീട്ടില്‍ എത്തി. വീട്ടില്‍ അദ്ദേഹത്തെ കണ്ടില്ല. ഉമ്മുദ്ദര്‍ദാഇനെ കണ്ടു. അവര്‍ ചോദിച്ചു: ഈ വര്‍ഷം നീ ഹജ്ജ് ചെയ്യാന്‍ ഉദ്ദേശിക്കുന്നുവോ? ഞാന്‍ പറഞ്ഞു: അതെ, അപ്പോള്‍ അവര്‍ ആവശ്യപ്പെട്ടു: ഞങ്ങള്‍ക്കുവേണ്ടി നന്മക്കായി നീ അല്ലാഹുവിനോട് പ്രാര്‍ത്ഥിക്കണം. കാരണം നബി(സ) പറയാറുണ്ട്, തന്റെ സഹോദരന്റെ അഭാവത്തില്‍ അവനുവേണ്ടി ഒരു മുസ്‌ലിം നടത്തുന്ന പ്രാര്‍ത്ഥന സ്വീകരിക്കപ്പെടുന്നതാണ്. അവന്റെ തലഭാഗത്ത് ഏല്‍പ്പിക്കപ്പെട്ട ഒരു മലക്കുണ്ട്. അവന്‍ തന്റെ സഹോദരനുവേണ്ടി പ്രാര്‍ത്ഥിക്കുമ്പോഴൊക്കെ ഏല്‍പിക്കപ്പെട്ട മലക്ക് പറയും: ‘ആമീന്‍, അതുപോലെ നിനക്കും പ്രതിഫലം ലഭിക്കും.’ അദ്ദഹം പറഞ്ഞു: അനന്തരം ഞാന്‍ അങ്ങാടിയിലേക്ക് പുറപ്പെട്ടു. അവിടെ അബുദ്ദര്‍ദാഇനെ കണ്ടുമുട്ടി. അദ്ദേഹവും നബി(സ)യില്‍ നിന്ന് ഉദ്ധരിച്ചുകൊണ്ട് ഉമ്മുദ്ദര്‍ദാഅ് പറഞ്ഞതുപോലെ എന്നോട് പറഞ്ഞു.’(15)

ഈ നിര്‍ദേശങ്ങളെല്ലാം അനുസരിക്കുവാന്‍ നാം സന്നദ്ധമായാല്‍ നമുക്ക് പരസ്പരം സ്‌നേഹിക്കുവാനാവും. അല്ലാഹുവിന്റെ പേരില്‍ പരസ്പരം സ്‌നേഹിക്കുവാന്‍ സാധിച്ചാല്‍ പരലോകത്ത് അസൂയാര്‍ഹമായ സ്ഥാനമാനങ്ങള്‍ നേടിയെടുക്കുവാന്‍ സാധിക്കും. തീരുമാനിക്കേണ്ടത് നമ്മളാണ്. പരസ്പരം വെറുത്ത് അല്ലാഹുവിന്റെ വെറുപ്പിന് പാത്രമാവേണമോ, അതല്ല അല്ലാഹുവിനുവേണ്ടി പരസ്പരം സ്‌നേഹിച്ച് അവന്റെ സ്‌നേഹത്തിന് നിമിത്തമാകണമോയെന്ന്. പരസ്പരം സ്‌നേഹിക്കുകയും അങ്ങനെ അല്ലാഹുവിന്റെ സ്‌നേഹത്തിന് പാത്രമാവുകയും ചെയ്യാന്‍ അല്ലാഹു നമ്മെ അനുഗ്രഹിക്കട്ടെ (ആമീന്‍).

————————————————————————-

1,2,3,5,7,8,11,12,13,14,15) സ്വഹീഹ് മുസ്‌ലിം

4) സ്വഹീഹുല്‍ ബുഖാരി, സ്വഹീഹു മുസ്‌ലിം

9,10) സ്വഹീഹുല്‍ ബുഖാരി

6) സുനനു അബൂദാവൂദ്-സ്വഹീഹാണെന്ന് ഇമാം അല്‍ബാനി സാക്ഷ്യപ്പെടുത്തിയത്

Read More